Abih angok mangayuh kareta.

Kamis, 09 Juni 2011

Mulai Abih Angok

“Lah mulai abih angok pambalap awak Tan!” Baitu sorak Udin Kuriak sasudah mambaco surek kaba ‘Singgalang’ pagi kapatang di lapau Uwo Pulin. “Abih angok baa? Mati mukasuik Udin?” Tanyo Tan Baro. “Indak. Lah malapuih angoknyo tu, sahinggo urang lain se nan manang taruih,” Udin manjalehan apo nan inyo mukasuik jo istilah abih angok tu. “Ha....ha...., itu indak aneh doh Din. Sajak samulo indak banyak nan maramal pambalap kampuang awak ka bisa manjadi juara,” baleh Tan Baro. “Baa tu Tan?” Tanyo Mak Pono. “Yo, karano pambalap awak banyak indak siapnyo. Urang-urang tu datang jauah-jauah dari lua nagari pasti punyo motivasi manang, salain motivasi untuak mancaliak kaindahan alam Minangkabau ko. Nah, karano motivasi bantuak itu, mako pambalap-pambalap dari lua nagari tu mampasiapkan diri dari jauah-jauah hari. Ciek lai, pambalap-pambalap tu memang hanyo itu se nan inyo adok-i tiok hari. Pagi latihan, siang latihan dan patang-patang hari juo latihan. Pambalap dari kampuang awak? Lai amuah bana latihan tiok hari, tapi dapuanyo indak barasok, baa pulo ka bisa konsentrasi?” Baitu Tan Baro maagiah analisa. “Pambalap awak ketek-ketek badannyo Tan!” Sorak Uncu Labai. “Itu juo manjadi panyababnyo mah. Tapi indak salalu badan ketek indak batanago Ncu. Kalau lai latihan taruih, ditambah jo makanan bagizi, ambo raso badan ketek indak masalah bana doh. Caciang se nan indak batulang bisa mangguriak tanah. Itu dek latihan taruih,” baleh Tan Baro. “Iyo mah Tan. Kabiasaan di nagari awak ko, latihan baru basitungkin kalau lah ka batandiang. Kalau indak ado ka batandiang, jarang latihan. Jadi, manuruik den wajar se capek abih angoknyo,” kato Angah Piyan pulo. “Manuruik pandapek den, pambalap awak harus kalah dan indak buliah manang,” manyalo pulo Kari Garejoh. “Baa tu Ri?” Tanyo Udin. “Tuan rumah nan baiak tu adolah nan maharagoi tamu-tamunyo. Jadi, agiahanlah juara atau hadiah ka tamu-tamu nan tibo, supayo sanang hatinyo. Ijan bantuak patandiangan bola atau main poli di kampuang-kampuang maso saisuak. Dek takuik piala dibao tamu, dibuek lo duo klub untuak batandiang. Ado klub A, ado klub B,” baitu panjalasan Kari langkok jo contohnyo. “Ha....ha....., iyo pulo mah Ri. Kalau di awak juo hadiah, tantu bisuak-bisuak ko urang-urang tu maleh datang ka mari lai,” kato Uncu Labai mandukuang pandapek Kari. “Lah dapek kucindan Minang dek Kari namonyo mah. Urang Minang ko kan pandai mambuak alasan kalau inyo kalah. Nah, iko alasan nan paliang bijak. Biasonyo urang kalau kalah kan ado-ado se nan dipasalahan. Umpamonyo dalam balap sepeda tu ha, disalahan lo panitia atau sepedanyo bagai. Bak kecek pribahasa lamo, manari nan indak pandai bakatoan lantai pentas nan guyah,” kato Tan Baro. “Mudah-mudahan untuak tahun bisuak ado pambalap awak nan juara. Caronyo tantu latihan rutin tiok hari, bukan katiko ka batandiang se,” hanyo itu nan bisa dikatoan Udin lai. (eSPe St.Soeleman)