Masih Malatuih-Palanta Lapau

Masih Malatuih

Sadang lamak-lamak nyo maota di lapau Uwo Pulin sasudah sumbayang Tarawih tadi malam, Tan Baro jo kawan-kawannyo takajuik dek bunyi latusan indak jauah dari lapau tu. Malah, Mak Pono sampai taambuang dari tampek duduaknyo mandanga bunyi latusan tu. Mandanga bunyi bantuak itu, saluruh isi lapau mancaliak kalua. Ruponyo ado anak-anak mudo nan sadang mambaka mercon atau petasan. Salain itu ado pulo nan mambaka kambang api, mako mangkatutuihlah bunyinyo di udaro. “Paja-paja kalera mah. Tangga jantuang wak deknyo,” baitu kato Mak Pono sambia manjangkau aia putiah dari cerek plastik di ateh meja. “Lai pangajuik pulo Mamak yo?” Tanyo Uncu Labai. “Bantuak itu bunyi latusannyo baa lo ndak ka takajuik dek Uncu? Raso ka malompek jantuang den dibueknyo,” jawek Mak Pono. “Itulah makonyo pamarentah malarang main petasan. Salain mambuek urang takajuik, juo manggaduah ka urang nan sadang baibadah. Kini kan bulan puaso, malam-malam tu dipakai untuak baibadah. Salain sumbayang Tarawih jo rangkaiannyo, ado pulo nan baiktikaf di musajik. Atau bahkan, urang-urang nan sadang istirahat bisa tagaduah dek bunyinyo. Cuma sajo, larangan pamarentah tu indak dipatuhi. Buktinyo, tu mah sampai kini masih malatuih dimano-mano,” Angah Piyan maagiah pandapeknyo. “Malarang urang main petasan tu murahnyo Ngah!” Kato Tacin Barain. “Baa murahnyo?” Tanyo Angah Piyan. “Ijan buliah surang juo nan manjua petasan, mercon atau kambang api tu. Iko samo jo rokok mah. Malarang urang marokok indak bisa baitu se doh, tapi cubolah tutuik pabirik rokok tu, pasti banyak nan baranti marokok mah,” baleh Tacin. “Den ndak satuju kalau urang manggalehnyo dilarang. Karano, inyo manggaleh untuak mancari makan. Inyo manggaleh untuak maiduik-i anak-anaknyo. Apolai sudah puaso ko rayo. Jo apo nyo bali baju baru untuak anak-anaknyo, jo apo dibali bahan-bahan pambuek kue dek induak barehnyo, dan jo apo pulo inyo ka pulang kampuang bagai,” Kudun indak katinggalan basuaro. “Jadi baa andaknyo manuruik Kudun?” Tanyo Mak Pono. “Urang tuo harus mangontrol anak. Ijan pabiakan inyo mambali mainan nan bisa malatuih tu. Kalau saluruh urang tuo alah malarang anak-anaknyo, den yakin indak ka tadanga lai suaro latusan tu doh,” jawek Kudun. “Tapi anak-anak kini banyak nan bantuak kuciang saliah. Di muko awak iyo lai patuah, tapi kalau lah bakumpua jo kawan-kawannyo, lupo saluruh nasehat awak,” kecek Udin Kuriak pulo. Baitulah ota di lapau Uwo tadi malam. (eSPe St.Soeleman)