Palanta Lapau-Baliak an Liak

Mantari Pandidikan mamarentahkan ka saluruh kapalo sikola di nagari ko nan dulunyo mamintak pitih ka urang tuo murik. Nampaknyo parentah bantuak itu indak main-main. Pak Mantari ka maagiah hukuman ka kapalo sikola nan indak amuah mambaliak-an pitih-pitih pungutan tu. Tantu sajo iko manjadi kaba elok untuak urang tuo murik di saluruh Indonesia. Karano pitih nan lah talonsong dibayiakan ka rumah sikola bisa babaliak liak. Tapi apo iyo lai bisa dibaliak-an? Barita di surek kaba ‘Singgalang’ nan bajudul ‘Kembalikan Semua Uang Pungutan’ itu manjadi bahan ota di lapau Uwo Pulin sapulang dari sumbayang Tarawiah tadi malam. “Den raso indak ka bisa gai dek kapalo sikola mambaliak-an liak pitih masyarakaik tu doh,” kato Angah Piyan. “Baa tu Ngah?” Tanyo Mak Pono. “Tadi den baco barita ko, nan banyak manjadi pungutan di rumah sikola tu untuak pandaftaran, pambali pakaian saragam, es-pe-pe, uang ekstra kurikuler, uang ujian dan lainnyo. Kalau pitih pandaftaran, es-pe-pe, uang ujian sarato uang ekstra kurikuler den raso masih bisa dipulangan, karano alun tapakai lai. Tapi, kalau uang pambali pakaian saragam den raso indak bisa lai. Karano pakaiannyo lah diambiak dan lah dijaik dek anak-anak sikola,” baitu panjalasan Angah ka Mak Pono. Walau samulo ditujukan ka Mak Pono, namun lah salapaunyo urang mandanga. “Barang yang sudah dibeli tidak bisa ditukarkan lagi,” tadanga Ajo Tondeh mangecek. “Itu di swalayan atau di toko-toko moderen Jo. Tapi iko di rumah sikola. Pak mantari bana nan manyuruah baliak-an liak pitih-pitih dari masyarakaik tu,” baleh Angah. “Bia apak mantari, atau inyiak mantari bana nan nyuruah, kalau pitihe lah dibalian ka pakaian dan pakaian tu lah dijaik dek anak-anak. Ado pulo nan dilakek-an ka kaparaluan sikola atau untuak nan lain, kamanga wee?” Kecek Ajo baliak. “Yo, tapaso mandapek sanksi,” kato Angah. “Paliang-paliang sanksi-e tu pindah atau baranti manjadi kapalo sikola,” sambuang Ajo. “Sabananyo iko paringatan ka kapalo sikola di saluruh nagari mah, supayo indak basilanteh angan se mamintak pitih ka anak murik atau urang tuo murik. Karano, saluruh sikola negeri lah ado anggarannyo. Kacuali sikola swasta, itu tantu lain pulo caritonyo,” Tan Baro nan dari tadi sibuk mambaliak-baliak koran, lah sato pulo mangaluakan pandapeknyo. “Mudah-mudahan se tahun bisuak ko indak ado lai kapalo sikola nan basilanteh angan mamintak pitih untuak iyuran iko itunyo ndak Tan!” Baitu kato Udin Kuriak. “Yo, mudah-mudahan se parentah mantari ko bisa mambuek jaran kapalo sikola atau guru-guru mamintak iyuran untuak alasan apo se,” hanyo itu nan bisa dikatoan Tan Baro. (eSPe St.Soeleman)