Baunjun-unjun

Kaba kurang elok sampai ka talingo komunitas lapau Uwo Pulin. Urang-urang nan salamo ko diharagoi kini ditahan di panjaro Muaro, Padang. Mandanga kaba sarupo itu, talingo Mak Pono nan paliang sirah. Karano kaba paliang baru tu bakek angku palo sarato bakeh pajabaik dan nan masih manjabaik pun baunjun-unjun masuak panjaro. Memang itu baru kaba nan layak dipicayo, lantaran kapatang koran indak tabik. Tapi kabanaran carito tu ado. “Kalau memang iyo, berarti samakin banyak pajabaik jo bakeh pajabaik nan baunjun-unjun masuak tansi,” baitu kato Udin Kuriak mancubo mangomentari info nan sadang angek tu. “Itu namonyo tangan mancancang, bahu mamikua,” baleh Angah Piyan. “Rancak banyak-banyak sakali masuak Din,” potong Kari Garejoh. “Rancak baa pulo?” Tanyo Udin. “Kan bisa rapek staf bagai di sinan. Kalau ciek di dalam nan lain di lua kan payah mangumpuannyo. Minimal untuak manyusun strategi ka muko,” kato Kari Garejoh. “Ha....ha...., rapek apo juo lai Ri?” Sorak Tan Baro. “Yo, saindak-indaknyo manyamoan persepsi,” baleh Kari. “Tapi urang-urang tu kan lun tau basalah lai,” Uncu Labai sato basuaro. “Yo, batua. Tapi ndak mungkin ditahan kalau memang ndak patuik ditahan,” kato Kari. “Kalau ndak ado api tantu ndak ado asok,” kato Tacin Barain. “Batua, tapi pak jaksa tu kan indak bodoh. Pasti ado alasan baa mangko apak-apak tu ditahan,” kecek Kari baliak. “Mudah-mudahan se sakalian tuduahan tu indak tabukti yo. Sakalian pajabaik atau bakeh pajabaik nan kini disidik aparat hukum ndak tabukti basalah. Gadang juo malu wak kalau banyak pajabaik jo bakeh pajabaik nan ditahan dek ulah kasus korupsi,” kecek Angah Piyan. “Mak, baa kok anok se? Biasonyo kicau Mamak labiah nyariang,” kato Udin. “Tadado bana Din!” Potong Tan Baro. “Mudah-mudahan iko hikmah dari Israk Mikraj, bapindah dari nan kurang elok ka nan elok,” kecek Uncu baliak. Baitulah ota di lapau Uwo Pulin pagi kapatang. (eSPe St.Soeleman)