Palanta Lapau-Ampia Buluih

Kalau ado barita main bola di koran, mako Udin Kuriaklah urangnyo nan paliang dulu maambiak koran tu untuak dibaco. Malah, kalau ado patandiangan bola kaki di televisi, Udin bisa-bisa indak mangijok manonton. Sapanek apo se dek bakarajo, kalau ado acara patandiangan bola kaki di tipi manjalang subuah, Udin amuah batanggang manunggunyo. Kalau paralu sangajo dibali kopi sarato makanan ringan supayo indak mangantuak. Udin sabana gilo bola! Pagi kapatang, barita nan paliang duluan dicari Udin adolah patandiangan antaro Indonesia malawan Turkmenistan. Walau patandiangan pra piala dunia tu lah ditontonnyo malam-malam, namun mambaco baritanyo pentiang juo dek Udin. Inyo nio mambandiangkan antaro nan ditonton jo nan dibaco. “Iko baru mantap barita koran ‘Singgalang’. Memang iko kanyataan tadi malam. Saandainyo masih ado siso wakatu agak satangah jam lai bisa buluih pandeka Merah Putiah dek anak-anak Turkmenistan tu mah,” baitu kato Udin Kuriak mamulai ota. “Kalau den mancaliak, di babak kaduo pamain awak tu lah mulai damam pangguang. Untuang se lai masih ado salisiah gol dan awak manang. Saandainyo podo main ampek-ampek misalnyo, bakubua harapan tu di Istora mah,” Kari Garejoh nan juo gilo bola mulai mangomentari apo nan dikatoan Udin. “Kalau pandapek den, Indonesia tu ampia buluih gara-gara sok-sok hebat. Mantang-mantang batandiang di kandang surang, lapangan rancak pulo dibandiangkan batandiang di kandang Turkmenistan, banyak nan mampa mainkan bola di daerah patahanan surang. Mancaliak nan bantuak itu tantu paneh hati lawan. Namonyo urang lah paneh, pasti tibo sumangeknyo untuak mambaleh kakalahan,” Mak Pono lah sato pulo basuaro. “Sapandapek wak Mak. Kalau manuruik den, awak ampia buluih di kandang surang dek ulah sok. Mantang-mantang lah manang ampek satu, sudah tu sok-sok hebat lo gai. Urang nan sok pasti dibanci Allah, dan itulah hasilnyo. Batirik-tirik se gawang awak buluih dek anak-anak Turkmenistan tu,” kecek Uncu Labai. “Tapi masih untuang awak manang ciek Ncu,” potong Udin. “Bak kecek Udin tadi, saandainyo masih ado wakatu, bisa bagawa janang tadi malam mah. Yo bisa ditalanjangi kasabalasan awak dek urang dari pacahan Uni Sovyet tu,” kato Kari. “Lai indak ado lo main sabun Ri?” Tadanga suaro Tacin Barain nan dari tadi anok se mambaliak-baliak koran di suduik palanta. “Kok itu iyo ndak tau wak doh. Tapi nan jaleh, kalau caro main bantuak tadi malam dipatahankan, yakin den awak indak ka lolos di putaran salanjuiknyo doh. Karano samakin ka muko, lawan samakin barek. Makonyo saran den, anak-anak Merah Putiah tu paralu disiplin jo posisinyo surang-surang. Kalau lah manang ijan capek gadang iduang,” kato Kari baliak. Baitulah ota urang-urang di lapau Uwo Pulin pagi kapatang. Kalau didanga sapinteh, lah samo pulo jo pangamat sipakbola mangecek urang-urang tu. (eSPe St.Soeleman)