Featured Video

Jumat, 19 Agustus 2011

Palanta Lapau-Lopu Atau Sangajo


Ulang tahun nagari ko lah salasai. Upacara juo lah diadokan pado hari nan samo. Bamacam kagiatan dibuek untuak mamariahkan ulang tahun nagari ko.
Kalau diukua-ukua, umua nagari ko memang lah cukuik tuo. Anam puluah anam tahun tantulah indak mudo lai doh. Saumpamo manusia, di umua sabanyak itu pasti lah bauban dan banyak pulo nan lah punyo cucu. Malah, ado nan pikun di umua sabanyak itu.
Di koran ‘Singgalang’ kapatang, banyak barita bakaitan jo paringatan ulang tahun RI nan ka anam puluah anam tu. Maklum, satiok daerah mamparingatinyo, bahkan sampai ka lua nagari bagai. Bak kecek Ajo Tondeh, saumpamo ado urang Indonesia di bulan, pasti ado pulo upacara tanggal tujuah baleh Agustus di situ mah.
“Dari banyak barita paringatan tujuah baleh Agustus di koran ko, ciek se nan manarik di den nyo,” kato Mak Pono.
“Barita nan ma tu Mak?” Tanyo Udin Kuriak.
“Iko ha!” Jawek Mak Pono sambia mampacaliak-an barita di halaman partamo nan bajudul ‘Warga Lupa Kibarkan Bendera Merah Putih’.
“Ado juo ciek lai mah Mak, di halaman dalam kalau ndak salah ado pulo kantua bank nan talambek manaiak-an bendera. Itu tajadi di kampuang Uncu,” kato Kari Garejoh.
“Lupo atau sangajo?” Tanyo Ajo.“Sabananyo kalau awak caliak dan awak paratian, memang iyo banyak di antaro awak nan indak mamasang bandera. Padohal dulu-dulunyo lah diumumkan supayo tigo hari manjalang tujuah baleh Agus dan tigo hari pulo sasudah tujuah baleh Agustus, bandera harus tapasang taruih,” kato Angah Piyan.
“Kini urang banyak lupo lantaran negara juo lupo jo rakyaiknyo,” potong Tacin Barain.
“Kalau itu alasannyo, berarti awak lah sabana lupo. Indak sajo lupo jo paringatan hari kamerdekaan, tapi juo lupo palajaran wakatu sikola. Kalau ndak salah guru-guru awak dulu bapasan, ‘jangan tanya apa yang telah diberikan negara kepada kamu, tapi tanyakan apa yang dapat kamu berikan buat negara’. Kalau awak lai bapikia janiah, lah banyak nan diagiahan dek negara ka awak. Tanah, aia angin nan awak pakai ko kan dikuasoi dek negara. Nah, ikolah nan awak lupo atau sangajo malupoannyo,” baitu kecek Tan Baro mancubo maagiah pangaratian konco-konconyo.
“Mukasuik den paratian pamarentah Tan. Apak-apak pajabaik tu sibuk se jo dirinyo dan kalompoknyo, sahinggo lupo jo masyarakaik nan lah mamakiak dek kasulitan ekonomi. Janji-janji hanyo manih wakatu kampanye. Tapi sampai kini, kantuik busuaknyo indak lapeh lai untuak rakyaik ko. Katonyo mambarantas korupsi, tapi malah korupsi kok makin manjadi-jadi?” Kato Tacin manjalehan.
“Den satuju jo Tacin. Masyarakaik ko sibuk mancari makan, sahinggo lupo jo tanggal dan lupo jo tampek panyimpanan bandera,” tadanga pulo suaro Pak Osu.
“Manga itu, dek ulah bakureh, jo angok bisa lupo wak mah. Baa gak ti?” Potong Ajo Tondeh.
“Harusnyo awak indak lupo jo hari kamardekaan tu doh,” kecek Udin.
“Harusnyo memang bantuak itu Din. Tapi daripado bacakak jo galang-galang. Apolai kini bulan puaso. Urang labiah banyak bapikia untuak babuko dan pasiapan hari rayo,” sambuang Tacin. (eSPe St.Soeleman)

Tidak ada komentar:

Posting Komentar