Palanta Lapau-Dijapuik,Jan Dinanti

‘Laporkan Pungli Tonase’. Itulah barita di koran ‘Singgalang’ nan dijadian bahan ota dek komunitas lapau Uwo Pulin manjalang masuaknyo wakatu babuko kapatang. Memang, masalah muatan oto prah lah acok bana manjadi ota di lapau tu. Karano, dek muatan oto nan balabiah tulah jalan capek rusaknyo. Dek muatan balabiah tu juo banyak kacalakaan. Saindak-indaknyo dek oto prah bamuatan balabiah tu, tajadi macet. Sasudah pamarentah maatur muatan oto prah, banyak tajadi protes. Malah, indak saketek pulo nan nekad malangganyo, walau harus mambayia maha. Kanyataan itu dipagunokan dek oknum-oknum patugas untuak mampakayo diri surang. Karajo nan sarupo itu namonyo pungli. Kini, pamarentah mamintak ka siapo sajo nan maraso kanai pungli atau masyarakaik sacaro umum supayo malapor. Dalam pangana sabagian urang di lapau Uwo, pamintaan pamarentah tu indak masuak aka dan bisa-bisa manambah karajo. “Siapo pulo supir nan ka malaporkan pungli ko? Nan maagiah pitih tu inyo, gara-gara muatannyo balabiah. Itu kan samo se jo uwia-uwia mintak gatah dek Angah,” baitu kato Mak Pono. “Nan di koran ‘Singgalang’ ko pamarentah mintak ka masyarakaik nan mancaliak ado pungli supayo malaporkan masalahnyo ka aparat, Mak!” Baleh Angah. “Ha...ha...., batambah lawak taraso di den,” kato Mak Pono. “Lawak baa lo?” Tanyo Angah indak mangarati. “Siapo pulo masyarakaik nan ka mancaliak ado indaknyo pungli di jambatan timbang Ngah? Partamo jambatan timbang tu rato-rato indak di pamukiman panduduak doh. Nan kaduo, transaksi dilakukan dalam ruangan. Biasonyo nan tau hanyolah nan maagiah jo nan manarimo se,” kecek Mak Pono mangatoan alasannyo. “Bantuak tau bana Mamak jo caro karajonyo mah,” tadanga pulo suaro Tan Baro. “Baa lo ka indak dek Tan Baro? Wak den kan ampia tiok pakan pulang kampuang. Sabalun sampai di kampuang den tu ado jambatan timbang. Ciek lai, kawan-kawan den juo banyak nan manjadi supir oto baro,” jawek Mak Pono. “Kalau baitu caritonyo baa ndak Mak laporkan ka patugas?” Tanyo Udin Kuriak. “Apo nan ka den laporkan?” Mak Pono baliak batanyo. “Yo, carito kawan-kawan Mamak tu lah!” kato Udin. “Itu nan manambah karajo namonyo Din. Lai bana den laporkan, beko patugas pasti mintak buktinyo. Kalau ndak ado bukti baa pulo mamprosesnyo. Kasudahannyo hari den abih, hasienyo ndak ado,” baleh Mak Pono. “Jadi baa mustinyo?” Tanyo Angah. “Mustinyo patugas tu harus ado nan maawasi. Atau dalam istilah lainnyo nan mangawasi tu harus japuik bola. Ijan mananti se. Kalau mananti se, yakinlah indak ka ado parubahan doh. Contohnyo, jambatan timbang jauah di Sungai Lansek tu ha, nan maawasinyo di Padang, bilo ka batamu palanggarannyo. Nah, harusnyo pangawasnyo manjapuik ka situ. Diunian tiok hari. Tapi jan bantuak spion malayu,” kato Mak Pono. “Satuju ambo Mak. Satiok patugas di jambatan timbang harus ado nan maawasi dari dakek, tapi ijan sampai main mato pulo jo patugas. Kok mananti se, ambo raso iyo indak ka ado gai laporan doh. Kalau pun ado, pasti labiah banyak surek kaleang,” baitu komentar Tan Baro. Karano wakatu babuko lah dakek, urang-urang tu pun bubar. (eSPe St.Soeleman)