Pak Osu Takalok-Palanta

Lah labiah sapakan indak nampak ka lapau, eh tibo-tibo Pak Osu mancogok di lapau Uwo Pulin pagi kapatang. Salamo ko Pak Osu banyak babelok di kampuang, karano ado karajo manolong urang tuonyo. “Baapo langang lapau ko Wo?” Baitu tanyo Pak Osu jo logat kampuangnyo. “Rayo mah Su. Kawan-kawan banyak nan pulang kampuang,” Udin Kuriak nan manjawek. “Eh, iyo. Kapatang awak sumbayang rayo yo? Lupo den mah!” Hanyo itu tanggapan Pak Osu. “Kama se Pak Osu? Takalok?” Tanyo Ajo. “Ha...ha..., iyo. Di kampuang Pak Osu memang banyak nan takalok. Kalau indak picayo, caliaklah barita di koran ‘Singgalang’ hari kini. Iko ha!” Angah Piyan pulo nan mangecek sambia mampacaliak-an barita di halaman dalam nan bajudul ‘Lebaran Idul Adha Sepi, Pejabat Solok Selatan Takalok’. “Takalok tu kan manusiawi. Saluruh awak nan iduik di dunia laweh ko paralu takalok. Kalau indak pernah takalok itu namonyo ‘sonia’. Lai tau Angah?” Baleh Pak Osu. “Indak ‘Sonia’ doh Su, tapi ‘insomania’. Sumbarang bakecek-an se,” kato Udin. “Kan ampia samo bunyino mah,” Pak Osu indak kailangan aka mambaleh kato-kato Udin. “Bunyie iyo samo Su, tapi aratie babeda. Sonia tu anak Upiak Kamek nan di simpang bawah tu mah,” kato Ajo. “Kalau nan kamek-kamek tu jaleh dek Ajo yo,” baleh Pak Osu sambia galak sengeang. “Kan condong salero ka nan lamak, condong mato ka nan kamek. Hanyo urang takaloklah nan indak bisa mancaliak nan kamek-kamek tu. Tu mah contohe, hari rayo, tapi Pak Osu dingin-dingin je. Baa gak ti?” Baleh Ajo indak amuah kalah. “Pak Osu makan ubek lalok mah Jo!” Tadanga pulo sorak Kari Garejoh. “Ambo indak bapihak ka Pak Osu doh yo. Kalau soal rayo dingin, kapatang tu kan memang iyo di musim hujan tibonyo hari rayo. Malah, banyak nan bahujan-hujan sumbayang rayo. Kalau lai gadang musajiknyo iyo lai pindah ka musajik,” Tan Baro nan dari samulo anok se, lah sato pulo mangaluakan pandapek. Tantu sajo suasana ota samakin angek. Karano lah ado duo kubu. Kubu partamo manyarang Pak Osu nan samulo saolah-olah tagak surang, tapi kini lah ado kawannyo. Apolai Ajo Tondeh juo indak katinggalan cimeeh nan manjadi ciri khasnyo. “Bisuak-bisuak ko jan takalok juo lai ndak Su. Sagan wak jo urang lain,” kato Kari baliak. “Ganja incek mato tu jo anak piapi Su, pasti indak amuah takalok lai!” Sorak Mak Pono. Karano hari lah baransua siang juo, urang-urang tu mulai kalua dari lapau untuak pai karajo. Baitu juo Uwo Pulin mulai pulo bakameh, karano inyo ka pai balanjo ka pasa. (eSPe St.Soeleman)

(singgalang)