Featured Video

Selasa, 22 November 2011

Tungkek Mambao Rabah


“Iko sabana tungkek nan mambao rabah nampaknyo mah Tan!” Sorak Mak Pono kapado Tan Baro nan samo-samo duduak minum kopi pagi di lapau Uwo Pulin.
“Makonyo jan batungkek jo rumpuik saruik atau jo batang ubi kayu,” jawek Tan Baro basilengah.
“Iko lah madang bana kayunyo mah. Indak rumpuik saruik lai doh,” baleh Mak Pono.
“Kalau baitu, taguliciaknyo mungkin mah,” Tan Baro masih tanang-tanang se mananggapi apo nan dikatoan konco palangkinnyo tu.
“Apo tu Mak? Kok ka batungkek juo, pakailah nan tagok. Tungkek nan ka bisa manjamin kasalamatan. Kok lah batungkek pulo mangko rabah, kan lawak namonyo tu,” Angah Piyan sato sakaki.
“Iko ha, jabatannyo kapalo bagian hukum, tapi mambuek ruko anam petak indak pakai i-em-be. Masyarakaik ketek-ketek disuruah maurus i-em-be dulu sabalun mambangun. Padohal, kalau inyo kapalo bagian hukum tantu jaleh deknyo ma nan malangga hukum dan ma pulo nan indak,” Mak Pono manjalehan apo nan dimukasuiknyo sambia mampacaliak-an barita di koran ‘Singgalang’ nan bajudul ‘Bupati Tanah Datar Berang. Kabag Hukum Bangun Ruko Tanpa IMB’.
“Lai indak sadang mampacaliak-an kahebatan ka masyarakaik Mak? Nyo ado lo di antaro awak ko nan baparangai mantang-mantang mah. Mantang-mantang awak gadang, malendo se karajo. Bak kato pepatah juo, gadang malendo, cadiak manjua kawan,” kato Tan Baro.
“Kalau itu nan tajadi, indak patuik apak ko manjadi pajabaik doh,” kecek Mak Pono.
“Manuruik Mamak ndak patuik, tapi manuruik angku palonyo tapek bana. Tu mah contohnyo diagiah jabatan,” salo Udin Kuriak.
“Tapi kini kan angku palonyo berang dek ulah indak maurus i-em-be mambuek ruko,” kato Mak Pono baliak.
“Ado istilah urang tuo-tuo nan patuik diparatian. Kalau awak manjadi pamimpin atau urang nan didaulukan salangkah, ditinggikan sarantiang mustilah sarupo mamandikan kudo. Awak bana nan harus masuak ka dalam aia dulu. Ijan sarupo mamandian baruak, baoncek-an se ka dalam banda,” kato Angah Piyan.
“Pajabaik kini indak banyak nan amuah sarupo itu doh Ngah. Inyo kadang ado lo nan dikacak langan bak langan, dikacak batih lah bak batih pulo. Awak hebat namonyo mah, indak ka ado urang kampuang nan ka manyanggah,” potong Mak Pono.
“Nan indak banyak tu nan ka dicari. Bialah saketek asa lai boneh, daripado banyak tapi ampo barek se,” kato Angah baliak.
“Den raso apak ko kilaf atau bisa se izinnyo alun turun lai. Kan ado lo prinsip awak ko, daripado pitih abih se indak bakatantuan, labiah rancak dilakek-an se dulu. Sambia mananti izin kalua, diansua-ansua juo mambangun. Nah malang ka tibo namonyo, wakatu maansua-ansua tu datang angku palo, dan tajadilah sarupo nan dibaritakan koran ko,” baitu pandapek Tan Baro.
“Iyo lo mah. Awak ko harus babaiak sangko ndak Tan?” Kecek Udin.
Baitulah ota di lapau Uwo. (eSPe St.Soeleman)singgalang

Tidak ada komentar:

Posting Komentar