Rancak Diganti-Palanta

“Manuruik pandapek den iyo rancak diganti,” baitu kato Udin Kuriak sambia malatak-an koran ‘Singgalang’ di ateh meja. “Apo nan ka diganti Din?” Tanyo Malin Kacindin. Kapalo sikola nan indak maagiahan pakaian saragam anak-anak muriknyo. Padohal anak-anak tu lah mambayia,” jawek Udin. “Nan ma?” Tanyo Malin baliak bakaruik kaniang. “Ho...ho...., Malin indak tau doh yo. Kapatang ko ado anak es-em-a bademo manuntuik supayo dibagian pakaian nan dijanjikan samanjak awal tahun ajaran baru. Sampai kini, pakaian tu indak cukuik. Kato kapalo sikola pakaian tu ilang,” hanyo itu nan ditarangkan Udin ka Malin. Untuak dikatahui, sapakan ko Malin memang indak pernah ka lapau. Inyo sibuk di kampuang. “Sapandapek wak Din. Tadi den baco di koran ko, kapalo sikola tu indak bajanjang naiak, batanggo turun doh. Kalau memang itu kajadiannyo, tantu kurang pangalamannyo,” Angah Piyan lah sato pulo. “Mukasuik Angah?” Tanyo Udin. “Kecek barita koran ko, inyo indak pernah manjadi wakia kapalo sikola. Harusnyo untuak manjadi kapalo sikola kan malalui janjang wakia dulu. Nah, itu bana nan indak ditampuah. Ibaraik pisang, iko masak dek karbit,” jawek Angah manjalehan. “Kalau batua bantuak itu tantu cimburu urang-urang nan lah pernah manjadi wakia salamo ko. Atau jan-jan kapalo sikola tu ado hubuangan kaluarga jo pajabaik di siko ndak?” Malin mancubo maanalisa. “Indak taulah awak doh. Nan jaleh, masalah saragam tu den raso manjadi puncak masalah-masalah nan tajadi di sikola itu. Indak mungkinlah kalau hanyo masalah pakaian saragam sampai-sampai bademo bantuak itu,” baleh Udin. “Den indak satuju kapalo sikola tu dituka doh!” Tibo-tibo tadanga suaro Kari Garejoh. “Baa tu? Jan-jan dunsanak Kari?” Tanyo Angah. “Bia dunsanak atau indak, nan den indak satuju!” Baleh Kari. “Indak satuju, indak molah, tapi katoan alasannyo,” sambuang Angah. “Den indak satuju diganti, kalau panggantinyo samo jo nan kini, apolai kok kurang,” hanyo itu jawek Kari sambia galak manih. “Mingkaruang! Kecek den tadi kok iyo indak satuju,” hanyo itu nan bisa dikatoan Angah. “Pandidikan indak bisa dikalola sumbarangan se doh. Iko manyangkuik maso depan generasi. Kalau pamimpin pandidikan indak beres, tantu akan mampangaruahi kualitas pandidikan. Sadangkan lai beres pangalolanyo, lah banyak juo generasi kini nan indak beres. Kan lah awak caliak dan awak danga salamo ko, anak sikola lah santiang bantuak urang laki-bini di dalam biliak. Jadi, pandapek ambo, indak hanyo kapalo sikola nan itu se diganti doh, tapi saluruh kapalo sikola nan memang indak ado prestasi,” Tan Baro nan dari tadi anok se lah sato pulo basuaro. (eSPe St.Soeleman)