Uda Nazar

“Baa Tan? Lah tatangkok Uda Nazar tu?” Tanyo bantuak itu datang dari Angah Piyan nan baru tibo di lapau Uwo Pulin manjalang babuko kapatang. Tantu sajo Angah lah tau barita tu dari televisi nan indak baranti-ranti mambaritakannyo samanjak si Nazar ditangkok di lua nagari. “Bantuak-bantuaknyo iyo lah pasti baraso nan tatangkok di Kolombia tu adolah si Nazaruddin, sang buronan ka-pe-ka,” jawek Tan Baro. “Tapi pasprotnyo indak namo Nazaruddin doh, Tan!” Tadanga suaro Tacin Barain. “Indak pasprot doh Cin, tapi paspor,” Angah mampaelok-i bahaso kawannyo. “Iyo itu kecek den!” Baleh Tacin. “Iyo. Kabanyo mamakai paspor palasu dan itu memang lah diduga dek patugas. Karano paspor inyo kan lah dicabuik,” baitu panjalasan Tan Baro. “Pasti kini banyak nan angek-angek dan bahkan lah ado nan damam dek ulah tatangkoknyo Uda Nazar ko mah,” kato Kari Garejoh. “Baa lo kok bantuak itu?” Tanyo Tacin. “Salamo ko Uda Nazar tu bakicau se dari lua nagari. Banyak puncak kada urang nan tasingguang dek nyo. Iko nyo lendo, itu disasaunyo. Indak ciek jo duo urang nan sakik gigi sampai sakik hati deknyo lai doh. Alang kapalang, urang-urang nan dilendonyo tu justru urang gadang sadonyo. Kabanyo sipak manjalang kanai, inyo malendo Dirut pe-el-en pulo. Nah, jo kondisi bantuak itu mako banyak nan angek-angek sampai damam bagai. Kok iyo nyampang Uda Nazar ko mambao bukti-bukti ka siko, tantu baondoh-poroh ka ka-pe-ka dibueknyo,” Kari manjalehan mukasuiknyo. “Kalau memang bantuak itu kajadiannyo kabaa juo lai. Tangan mancancang, bahu mamikua,” sambuang Tan Baro. “Di den indak itu se nan marusuah doh Tan. Iko kan permainan tingkek tinggi nan malibatkan urang-urang hebat, lai indak ka ilang se barang bukti tu di tangah jalan. Bisa se datanyo masuak angin atau masuak pirus bagai. Atau bisa juo Uda Nazar tu bana nan ilang sabalun sampai ka Indonesia. Bisa se beko alasannyo sakik paruik atau serangan jantuang bagai. Karano, ado kapentiangan labiah gadang nan harus dilinduangi. Nio mangorbankan ciek atau banyak? Kali-kali bantuak iko bisa se tajadi,” kecek Kari. Tamanuang juo Tan Baro mandanganyo. Agak jalan kincia-kincia Kari sakali ko taraso dek inyo. Memang masuak aka juo apo nan disampaikan Kari tu. Atau bisa jadi ado pulo sandiwara sababak lai. Umpamonyo saolah-olah negara Kolombia indak amuah malapehan si Nazar dibao ka Indonesia. Kalau itu tajadi, tantu taambek proses hukum jadinyo. “Mudah-mudahan se apo nan diragui Kari dan urang banyak indak tajadi. Uda Nazar tu capek tibo di nagari ko, supayo kasusnyo bisa tarang bak hari. Kalau lah ditangani elok-elok, tantu nan luruih makanan banang, nan bungkuak makanan saruang,” hanyo itu nan bisa dikatokan Tan Baro. Karano wakatu babuko lah samakin dakek, urang-urang tu pun bubar. Canel tipi nan tadi di Jakarta lansuang pulo dialiahan dek Uwo Pulin ka tipi Padang. (eSPe St.Soeleman)