Barek dek Pangurus-Gebu Minang

Dalam pikiran Angah Piyan, Gebu Minang lah barek dek pangurus se, sahinggo indak nampak makan tangannyo ka masyarakaik. Bayangkan, pangurusnyo tigo ratuih tujuah puluah duo urang.
“Lah barek dek pangurus se Gebu Minang ko nampaknyo mah,” kato Angah sambia malatak-an koran ‘Singgalang’ di mukonyo.

“Kok baitu kecek Angah?” Tanyo Mak Pono.
“Iyo itu nan talinteh di pikiran den baa juo lai. Tadi den baco di koran ko, jumlah pangurus 372 urang, tapi nan datang di Mubes Padang Panjang indak sampai duo puluah urang,” baitu panjalasan Angah sasuai jo barita nan inyo baco.
“Barek dek pangurus atau pangurus nan barek-barek Ngah?” Tanyo Udin Kuriak.
“Ampia samo tu nyo. Barek dek pangurus, aratinyo dek talampau banyak, sahinggo payah organisasi mambaonyo. Pangurus nan barek-barek juo baitu. Barek aleh misalnyo, indak ado kagiatannyo doh,” jawek Angah.
“Jadi....., urang awak ko Ngah, kalau nio manjadi pangurus apo sajo pasti banyak nan nio. Malah indak saketek pulo nan candu. Tapi, katiko bakarajo, indak banyak nan amuah doh,” Tan Baro manyalo.
“Ha....., iyo tu mah. Takana di den maso mudo-mudo dulu di kampuang kami acok mambuek acara orgen tunggal. Wakatu mambuek panitia bagaduru nan amuah. Nan diintai cuma namo panitia dan masuak perai. Tapi, wakatu mambuek pentas, indak banyak nan sato doh. Apolai kok acara lah usai dan panitia harus mambukak pentas baliak, nan tingga hanyolah katua jo wakianyo se lai,” kecek Mak Pono.“Kabanyakan urang awak, masuak namo di organisasi adolah gengsi atau harago diri. Samati-mati angin untuak mampapanjang urutan bio data. Kan bangga juo, baraso si Anu pernah manjadi katua, atau apolah namonyo di organisasi. Apolai kalau organisasi tu gadang sarupo Gebu Minang,” baleh Tan Baro.
“Tantu iyo, kalau masuak namo ka pangurus tu manandokan awak hebat dan bisa disabuik-sabuik dek urang kampuang,” potong Kari Garejoh.
“Kalau di den indak guno namo doh. Nan paralu tu hasilnyo apo,” potong Angah.
“Itu kan Angah. Satiok awak kan punyo jalan pikiran surang-surang,” baleh Tan Baro.
“Iyo, tapi barangkali banyak urang kampuang ko nan nio mancaliak makan tangan Gebu Minang tu. Saindak-indaknyo sumbangan untuak urang kampuang. Karano dalam utak urang kampuang awak, nan bakumpua di Gebu Minang tu adolah urang-urang kayo se sadonyo. Urang-urang manggaleh kaki limo indak ado di organisasi tu doh,” sambuang Angah.
“Batua. Di koran ko tiok hari ado barita anak-anak hebat tapi bansaik nan ditarimo di paguruan tinggi, manangih baibo hati. Lai ditarimo di paguruan tinggi tanamo, pitih tu bana nan indak ado. Ma nyo Gebu Minang tu?” Pinteh Uncu Labai.
“Kok sato lo nan manggaleh kaki limo maurus itu, bisa mati ndak makan pulo lah inyo di rantau,” kecek Kari.
Baitulah ota di lapau Uwo Pulin pagi kapatang. Di lua hujan turun indak labek bana. Saparo urang di dalam lapau tu maleh untuak pai karajo. Takuik basah kuyuik. (eSPe St.Soeleman)