Palanta Lapau-Rusak

‘Bangsa Rusak karena Pemimpin’. Itulah ciek judul barita di koran ‘Singgalang’ nan sempat dibaco Udin Kuriak pagi kapatang di lapau Uwo Pulin. Karano maraso barita tu rancak, Udin mambaconyo elok-elok. Kawan-kawan nan lain juo sibuk mambaco barita-barita lain. Maklum, koran urang awak tu kan banyak halamannyo, dan supayo samo-samo dapek mambaco barita, koran tu dibagi salai surang. Nah, kabatulan Udin mandapek bagian nan pakai barita sarupo itu. “Baa pandapek Tan Baro? Kecek tokoh masyarakaik dari Padang Panjang, nagari ko rusak dek ulah pamimpin,” tanyo Udin ka Tan Baro nan duduak di sabalahnyo. “Batua mah. Pamimpin tu kan indak beda jo imam di dalam shalat. Inyolah nan diikuti. Kalau imam salah, tantu makmum juo salah. Atau saumpamo kareta api, pamimpin tu samo jo lokomotif dan rakyaik adolah gerbongnyo. Kalau lokomotifnyo nan rusak, pasti rusak sampai ka balakang. Kalau lokomotif indak bisa manggarik, mako anok sampai ka balakang. Karano itu ijan sumbarang se mamiliah pamimpin,” baitu tanggapan Tan Baro. “Kalau bangsa nan lah rusak indak ado bengkenyo doh Din!” Potong Kari Garejoh. “Ha....ha...., tantu iyo. Nan ado bengkenyo cuma kandaraan, pakakeh elektronik atau lainnyo. Kok nagari ko nan rusak yo tapaso basamo-samo urang nan iduik di nagari ko mampaelok-an,” baleh Tan Baro. “Kok diupahan je ka ughang lain supayo nagari ko elok baa nyeh?” manyalo pulo Ajo Tondeh. “Ajo sangko bangsa ko oto? Bisa diupah-upahan ka urang lain,” Tanyo Mak Pono. “Tadi kan kecek Tan Baro samo jo kureta api,” jawek Ajo. “Tadi tu umpamonyo Jo. Makonyo manyimak, ijan sumbarang manyorong se. Masih untuang Ajo indak tasorong ka tungku angek atau ka lubang basipasan,” kato Tan Baro. “Sabananyo iko lah hukuman untuak nagari ko mah. Sajak dulu banyak di antaro awak nan sombong. Baitu juo pamimpin hanyo mautamokan kapentiangan surang jo kalompoknyo. Cubolah bandiangkan nagari ko jo nagari-nagari lain, walau nagari urang alun lamo ko mardeka, tapi bisa labiah hebat. Walau nagari urang indak ado potensi alam, tapi jauah labiah maju. Nah, awak sajak dulu bangga se taruih, karano subur talatak di tangah-tangah bumi. Tapi apo buktinyo? Sagalonyo tapaso dibali dari lua nagari. Malah, bareh sampai buah-buahan didatangkan juo dari lua nagari,” giliran Uncu Labai mangecek. “Jalan juo banyak nan rusak dek ulah oto prah bamuatan barek,” kato Tacin Barain. “Eyayay....., kalau itu nan disabuik banyak nan rusak di nagari ko mah. Indak jalan se doh, tapi bak kecek tadi pamimpinnyo juo banyak nan rusak. Itu tandonyo Tacin juo indak manyimak ota urang. Asa lai mangecek se,” baleh Udin. Di lua lapau, dari jauah nampak Kudun mandorong motor. Lah tabik paluah inyo dek manundo. “Baa Dun?” Tanyo Mak Pono. “Itulah Mak, mati tagak se,” jawek Kudun. “Bisuak bali nan indak amuah rusak lai Dun!” Sorak Kari. (eSPe St.Soeleman)