Gadang Pasak daripado Tonggak

‘124 Pemerintah Daerah Terancam Bangkrut’. Baitu judul barita di koran ‘Singgalang’ nan tabik kapatang. Walau baritanyo indak gadang, tapi dijadikan bahan ota dek komunitas lapau Uwo Pulin. Di dalam barita tu dikatoan daerah sabanyak itu bisa bangkrut dek ulah balanjo labiah gadang dari pandapatan. Bak kato pepatah ‘Gadang Pasak daripado Tonggak’. Bayangkan untuak balanjo kaparaluan pagawai se labiah anam puluah parsen. Itu aratinyo hanyo ampek puluah parsen se nan tingga untuak kaparaluan lain. Dalam kaparaluan lain tu lah pasti banyak lo bagi-bagiannyo. “Kalau bangkrut daerah-daerah sabanyak iko baa caronyo lai tu Tan?” Tanyo Mak Pono. “Indak dapek aka doh. Paliang-paliang digabuang jo daerah lain. Umpamonyo bantuak Padang ko digabuang jo Piaman atau sabaliaknyo,” jawek Tan Baro. “Babaliak bantuak saisuak tu Tan?” Tanyo Uncu Labai. “Yo, itu resiko. Dulu sabalun daerah dipacah-pacah kan ciek. Sarupo kampuang Mak Pono, kini tigo daerah otonom. Padohal dulunyo cuma ciek. Baitu juo kampuang Ajo Tondeh dulunyo ciek kini manjadi tigo daerah,” kato Tan Baro manjalehan. “Itu dek ulah nio dapek banyak dulunyo mah, dipacah-pacahlah nagari ko. Disangko lai ka sero, eh ruponyo bangkrut,” potong Udin Kuriak. “Batua Din, pemekaran daerah labiah banyak untuak kapentiangan syahwat politisi atau urang-urang nan awih kakuasaan. Indak maukua bayang-bayang sapanjang badan,” salo Angah Piyan. “Kalau indak bantuak itu ndak lo maju nagari-nagari nan salamo ko tingga doh, Ngah. Contohnyo kampuang den, sajak otonomi daerah ko lah hebat,” kato Pak Osu nan lah mancogok pulo baliak di lapau Uwo. “Iyo. Itu hanyolah bagian nilai positif, tapi suduik negatifnyo juo ado, Su. Tu mah bak kecek barita koran ko ha, gadang pasak dari tonggak, gadang balanjo dari pandapatan. Kasudahannyo daerah tu babaliak sarupo samulo,” kato Tan Baro. “Itu tagantuang jo kapalo daerahnyo mah Tan. Saandainyo kapalo daerah lai lasak mancari tambahan pandapatan atau investor, den raso daerah tu bisa labiah hebat dari daerah induaknyo,” baleh Pak Osu. “Salain daerah bisa hebat, saku-saku kapalo daerah jo pajabaiknyo juo manjadi barek,” potong Kari Garejoh. “Baa tu Ri?” Tanyo Udin. “Banyak fi jo baso basi,” jawek Kari. “Kini indak buliah manarimo bantuak itu lai doh Ri!” Sorak Kudun. “Manarimo lansuang ndak buliah, ndaklah. Kan bisa jarak jauah se. Kini apo nan indak bisa jarak jauah dek Kudun ko?” Kato Kari. “Bia digabuang se baliak, buliah apa pulo dek awak bara jumlah propinsi jo kabupaten kota. Salamo ko indak tau awak bara jumlah propinsi dan kabupaten kota di Indonesia ko lai doh,” baitu tanggapan Udin. “Banyak nan kailangan jabatan Din!” Sorak Kari. “Bia se lah. Manga lo itu wak pikian. Urang-urang tu se salaku pamimpin ndak pernah mamikian awak doh,” hanyo itu tanggapan Udin basilengah. (eSPe St.Soeleman)