GARETAK SAMBA

“Iko lai indak garatak samba se ko Tan?” Tanyo Kari Garejoh ka konco palangkinnyo nan samo duduak di palanta lapau Uwo Pulin pagi kapatang. “Sia nan main garatak-garatak juo di zaman kini ko? Kini indak zaman panjajah doh. Kalau maso saisuak iyo bisa main garatak-garatak se. Sakali garatak lah curu urang dibueknyo. Tapi kini urang lah cadiak-cadiak. Indak pas paretongan manggaratak bisa babaliak awah panabangan,” baitu komentar Tan Baro. “Iyo yo, tapi iko kecek koran ‘Singgalang’ kapatang, kalau ado juo es-pe-be-u nan malayani jarigen ka ditutuik operasionalnyo. Satau den, garatak-garatak sarupo iko lah acok sajak dulu. Satiok tajadi kalangkaan minyak di es-pe-be-u, pasti kalua kecek dari pihak takaik ka manutuik atau maagiah sanksi pihak pom bensin. Nah, sampai kini alun tadanga di den ado es-pe-be-u nan batutuik dek ulah malayani urang mambao jarigen lai. Baa pandapek Tan Baro?” kecek Kari. “Iyo lo mah yo? Agak jalan kincia-kincia Kari kini mah,” jawek Tan Baro. “Di den iyo alun ado lo tadanga adonyo es-pe-be-u nan ditutuik dek ulah malayani urang mambali pakai jarigen doh Ri. Padohal den caliak-caliak ampia saluruh es-pe-be-u di nagari ko malayani urang mambali jo jarigen. Kok indak bisa mambali siang, malam hari saambuah banyaknyo urang mambao jarigen mah. Ado nan pakai oto pikap, ado pakai becak, pakai motor dan ado nan bajinjiang se,” Udin Kuriak lah sato pulo. “Kalau indak buliah urang mambao jarigen ka es-pe-be-u, jo apo urang manggaleh di kios mambao minyak ka kadainyo? Apo lai bisa pa-kai kain saruang atau pakai plastik asoi? Harusnyo patimbangkan lo itu dek pajabaik nan mangecek tu,” Mak Pono indak katinggalan mangaluakan pandapeknyo. “Dimasuak an ka tangki motor, sudah tu sampai rumah disalin baliak,” potong Tacin Barain. “Iko karajo urang gilo namonyo mah,” hanyo itu tanggapan baliak dari Mak Pono. “Kini kan iyo banyak urang gilo mah. Malah, nan ka gilo jauah labiah banyak lai,” Tacin indak amuah kalah. “Satuju den jo Mak Pono. Malarang urang mambao jarigen ka es-pe-be-u atau maagiah sanksi tutuik ka es-pe-be-u nan malayani urang mambao jarigen indak pas rasonyo. Karano urang manggaleh minyak ketek-ketek di kios juo ado izinnyo dan itu mambantu ka masyarakaik. Harusnyo diatur, di es-pe-be-u ma se nan buliah maambiak pakai jarigen, bara batas maksimal nan dibuliahan untuak surang panggaleh dan jadwalnyo jam bara se. Itu diatur pakai kupon. Jo caro bantuak itu baru samo-samo lamak. Pangusaha es-pe-be-u dapek pitih, urang manggaleh eceran dapek untuang dan konsumen lain indak tagaduah,” baitu kecek Tan Baro. “Ko indak, tiok taun pangusaha es-pe-be-u ko kanai garatak sambalado. Dek lah acok-acok bana kanai garatak coitu tantu ndak mangkuih lai. Kasudahannyo main ilimu basi se lai. Basipakak jo basibanak se urang-urang tu. Nan pangusaha es-pe-be-u indak takuik digaratak dan urang manggaleh eceran juo basipakak se mambao jarigen ka situ,” sambuang Kari. (eSPe St.Soeleman)