Palanta Lapau-Pakaro naik indak naik

“Banyaklah niniak antaro niniak/indak sasayang si niniak mamak/banyak naiak pakaro naiak/indak sarumik naiak harago minyak”.

***
Lah tadanga pulo Uncu Labai bapantun di dalam lapau Uwo Pulin. Memang, kalau masalah pantun, Uncu-lah nan paliang hebat di situ. Maklum, sabalun pindah ka Padang, dulunyo Uncu juo tukang rabab di kampuangnyo.
“Harago minyak indak jadi naiak doh Ncu. Indak laku pantun bantuak itu doh lai,” Mak Pono mananggapi pantun Uncu.
“Bialah indak laku. Tapi Mamak harus maakui, bia harago minyak indak naiak kecek pamarentah, nan harago kaparaluan sahari-hari kini lah naiak. Kok indak picayo Mamak cubolah pai balanjo ka pasa atau tanyoan ka mande paja,” baitu kato Uncu.
“Biasonyo harago barang tu naiak dek ulah naiaknyo harago minyak. Kini apo alasannyo?” Mak Pono indak pueh jo apo nan dikatoan Uncu.“Kalau soal alasannyo nan Mamak tanyo ka den iyo agak sulik manjaweknyo mah. Tapi analisa den, naiaknyo harago barang dek ulah ka masuak puaso. Biasonyo satiok manjalang puaso jo hari rayo harago barang-barang juo naiak. Salain itu, kini nan paliang mambuek harago barang naiak adolah naiaknyo gaji pagawai,” jawek Uncu.
“Pandapek den iyo dek ulah be-be-em Ncu. Sajak sabulan ko agak acok minyak abih di es-pe-be-u. Karano indak ado di es-pe-be-u, urang mambali di kios. Nah, harago di kios kan labiah maha,” kecek Udin Kuriak.
“Nan mambali minyak di kios tu cuma tukang ojek Din, indak ado hubuangan jo harago barang doh,” salo Tacin Barain.
“Lai ado. Nan mambali minyak di kios tu tukang becak motor nan mambao sayua dari Kuranji ka pasa raya. Karano harago minyak maha, tapaso ongkos dinaiak-an stek dan otomatis urang manggaleh sayua juo manaiak-an harago. He...he....,” baleh Udin.
“Carito soal naiak, barangkali wajar-wajar se harago barang naiak manjalang puaso. Karano pamintaan labiah banyak. Hukum pasa, kalau pamintaan banyak dan barang saketek, harago pasti labiah maha. Biasonyo naiak harago nan indak dikaranoan harago be-be-em, akan turun baliak. Tapi kalau naiaknyo dek ulah harago minyak, iyo indak bisa turun lai doh. Alun ado sajarahnyo lai doh,” lah mangecek pulo Angah Piyan.
“Itu je eboh lo tu. Indak sadoe barang naiak doh. Masih ado nan turun,” manyalo pulo Ajo Tondeh.
“Apo nan turun?” Tanyo Kari Garejoh.
“Karambia di Piaman turun mah,” jawek Ajo basilengah.
“Ajo kapunduang! Kalau indak turun baa kecek urang mambuek gulai? Lai ka mungkin karambia di pucuak batangnyo, ikan di dalam lawik, asam di gunuang bisa manjadi gulai? Lah dalang Ajo nampak di den mah,” baleh Udin.
“Udin nan dalang, manga lo aden?” Baleh Ajo indak amuah kalah.
“Ado ciek lai nan turun Jo!” Sorak Tan Baro.
“Apo?” Tanyo Ajo.
“Harago diri!” Jawek Tan Baro.
“Tapi nan naiak-turun juo ado,” Kari indak pulo katinggalan.
“Apo tu?” Tanyo Tan Baro.
“Bendera! He...he....” jawek Kari sambia galak manih.
Baitulah ota di lapau Uwo Pulin. Sadang sarius tibo-tibo se garah dan itulah nan mambuek suasana akrab di urang-urang tu. (eSPe St.Soeleman)