Tau Samo Tau-palanta lapau

Dek ulah banyaknyo oto prah nan parkir di tapi jalan, Pak Osu baabih hari di jalan dibueknyo. Harusnyo dari Lubuak Salasiah ka Padang hanyo paralu wakatu ampek puluah limo minik atau sajam, kini sampai ampek jam bagai.
“Sabana raman-raman den deknyo,” kato Pak Osu.

“Raman-raman dek a, Su?” Tanyo Udin Kuriak.
“Dek ulah oto prah nan diparkir di sapanjang jalan, macet deknyo. Dari Lubuak Salasiah sampai ka siko bisa ampek jam atau labiah. Padohal biasonyo cuma ampek puluah limo minik,” jawek Pak Osu.
“Iko buah reformasi mah Su,” kecek Angah Piyan.
“Buah reformasi baa pulo?” Tanyo Pak Osu.
“Samanjak reformasi, awak ko lah bebas sabebas-bebasnyo. Paraturan jo undang-undang saolah-olah indak diparatian lai. Demo, unjukrasa jo mogok saolah-olah manjadi sanjato. Padohal aturan-aturan nan ado tu, juo untuak masyarakaik. Contohnyo soal muatan oto prah tu. Kalau muatannyo balabiah, banyak bahayonyo. Bara banyaknyo oto prah nan putuih rem turun Sitinjau Lawik atau di daerah Solok tu. Indak taetong lai nyawa malayang deknyo. Sudah tu, dek ulah muatan balabiah, jalan manjadi rusak. Urang lain nan mamakai jalan juo tagaduah dan taniayo deknyo. Iko indak pernah manjadi pamikiran dek supir jo induak samang oto prah salamo ko doh,” kato Angah.
“Kalau den punyo pandapek lain Tan. Harusnyo antaro pamarentah jo induak samang oto prah tu punyo prinsip tau samo tau. Pamarentah harus tau jo kasulitan pangusaha oto dan pangusaha oto harus tau pulo jo aturan sampai ka akibaik kalabiahan muatan tu. Kalau bantuak itu pasti lamak,” kecek Mak Pono.
“Solusinyo?” Tanyo Tan Baro.
“Tagang bajelo-jelo, kandua badantiang-dantiang. Agiah dispensasi ka pangusaha oto prah tu malabiahi muatan dari bateh nan ditantukan. Umpamonyo satiok oto prah tu hanyo buliah balabiah muatan saton atau duo ton. Pangusaha ijan dapek di kuduak nak di kapalo pulo. Harus patuah jo dispensasi bantuak itu. Kalau balabiah juo dari itu agiah hukuman barek. Den raso iko labiah bijaksini daripado bijaksana, tapi manggaduah nan lain,” jawek Mak Pono.
“Wah mantap juo pamikiran Mamak sakali ko. Pakai prinsip tau samo tau yo,” sambuang Tan Baro.
“Te-es-te namoe mah Mak!” Potong Ajo Tondeh nan dari tadi anok se.
“Lah bisa lo Mamak manjadi anggota dewan mah,” semba Kari Garejoh.
“Nan lain se lah Ri!” Hanyo itu tanggapan Mak Pono. 
(eSPe St.Soeleman)