Bilih Toba ka Singkarak

Kaba kurang lamak dari kampuang Mak Pono ado di koran ‘Singgalang’. Katonyo ikan bilih dari Danau Toba beredar di daerah Singkarak. “Iko aneh lo mah Mak,” kato Kari Garejoh ka Mak Pono. “Aneh baa?” Tanyo Mak Pono nio tau. “Maso iyo bilih dari Danau Toba bisa ka Singkarak. Atau wartawan nan salah tulih?” jawek Kari. “Dari ma Kari tau?” Tanyato Mak Pono masih ragu jo informasi nan diagiahan konco palangkinnyo tu. “Danau Singkarak jo Danau Toba lah manyatu kini Ri,” potong Udin Kuriak. “Kan lai samo-samo danau juo, apo lo salahnyo. Tapi kalau ikan bilih Danau Toba sampai di sawah Mak Pono iyo aneh mah. Atau ikan bilih Danau Toba ado di lawik dakek Puruih juo indak baa awak maraso heran doh,” mangecek pulo Tacin Barain nan memang indak tau apo-apo. “Masalahnyo indak itu doh Cin. Bilih ko adolah ikan spesifik Danau Singkarak. Kalaupun ado ikan nan ampia samo bantuaknyo di Danau Toba, tapi rasonyo jauah beda. Ikan bilih Singkarak lah tanamo sampai kama-kama, samo lo jo bareh Solok. Nah, kini kalau nan baredar di situ adolah ikan dari Danau Toba, tantu paralu awak batanyo, apo ikan bilih lah punah di Danau Singkarak? Atau nelayan situ lah maleh manangkoknyo? Atau ado faktor lain? Kan iyo bantuak itu analisanyo ndak Tan Baro?” Baitu pandapek Kari Garejoh sambia mampaiyokan ka konco palangkinnyo nan duduak baadok-adok-an. “Tadi ambo baco, kecek ahlinyo, dijuanyo bilih dari Toba di sakitar Singkarak karano memang bilih Danau Singkarak lah ampia punah. Agak panjang caritonyo tadi ambo baco. Tapi nan taingek dek ambo, baraso nelayan di danau tu tiok wakatu manangkok bilih, tapi indak ado budidayanyo. Kalaupun ikan-ikan tu batalua biasonyo di dakek-dakek batang aia nan ado di sakitar danau. Kini, batang aia tu banyak nan kakurangan aia,” Tan Baro manjalehan apo nan taingek deknyo. “Kalau baitu baa caronyo lai Tan?” Tanyo Angah Piyan. “Pandapek ambo, sarancaknyo ado budidaya. Pamarentah musti malakukan langkah-langkah nan tapek supayo ikan bilih di Danau Singkarak tu indak punah. Kalau punah, indak kan ado nan bisa dibanggakan lai doh,” jawek Tan Baro. “Lai Tan!” Sorak Kari baliak. “Apo?” Tanyo Tan Baro. “Kapuak!” Jawek Tacin. “Kapuak apo ko Cin? Kok indak pandai mangecek upahan ka kawan,” lah manyorong pulo Ajo Tondeh. “Makonyo Ajo bajalan-jalan ka Danau Singkarak tu agak sakali duo kali. Paratian bana apo nan ado di situ. Di sapanjang rel kereta api, banyak batang kapuak, dan urang di situ manjadikannyo kasua atu banta. Kan iyo ndak Mak?” Kato Tacin mampaiyokan ka Mak Pono. “Iyo. Di sinan memang banyak kapuak, tapi nan jadi masalah tadi indak itu doh, malainkan ikan bilih. Jadi, jan sumbarang mangecek se,” jawek Mak Pono. “Ha....ha...., ghasailah, sumbaghang mengecek je muncuang buruak tu,” tambah Ajo. Baitulah suasana ota komunitas lapau Uwo Pulin sambia mananti wakatu babuko, kapatang. (eSPe St.Soeleman)