Bongka!

Bongka!

Udaro Kota Padang nampak agak bakabuik. Dicaliak sakileh bantuak-bantuak ka hujan. Barangkali samo se jo hati urang-urang nan duduak mananti wakatu babuko di lapau Uwo Pulin patang hari kapatang. Baa ka indak, puaso lah abih duo patigo. Tingga hanyo sapuluah hari lai, tapi tambahan pitih untuak pambali kaparaluan rayo alun nampak. Di rumah, anak-anak lah mamintak dibalian baju rayo. Induak bareh baitu pulo lah barancana mambuek kue iko, kue itu sarato lainnyo. Paniang kapalo urang-urang tu dibueknyo. Walaupun baitu, informasi-informasi dan barita-barita koran ‘Singgalang’ lai juo dijadikan bahan ota. Malah, garah jo kucindan indak bakurang dek ulah mamikian kaparaluan lebaran tu doh. Manjalang babuko kapatang, nan manjadi bahan ota dek Tan Baro sarato kawan-kawannyo adolah barita nan bajudul ‘Muatan Lebih Dibongkar’. Barita tu adolah soal muatan oto prah nan balabiah mulai bulan di muko dibongka di jambatan timbang. Salamo ko pamarentah masih mancaliak oto-oto prah tu bajalan jo muatan balabiah, tapi mulai bulan di muko harus dibongka di jambatan timbang dan pamarentah mambuek-an tampek panampuangnyo. “Kalau ado nan batanyo ka masyarakaik, wak denlah manusia nan partamo satuju jo aturan pamarentah ko,” kato Mak Pono ka kawan-kawannyo. “Aturan apo tu Mak?” Tanyo Uncu Labai. “Muatan-muatan oto prah nan balabiah lansuang dibongka di jambatan timbang,” jawek Mak Pono. “Kalau itu den juo satuju. Lah muak den mancaliak kurenah supir oto prah nan indak patuah tu. Padohal aturan mambatasi muatan tu dibuek juo untuak inyo dan masyarakaik banyak. Apo indak mancaliak supir-supir tu bara banyaknyo oto prah nan kacalakaan dek ulah indak talok lai mandaki lantaran muatan barek. Atau maluncua ka dalam jurang juo dek ulah remnyo indak bafungsi lantaran baban barek. Apo supirnyo indak sadar baraso jalan tu capek abih gara-gara otonyo nan bamuatan balabiah? Nah, kini den caliak-caliak supir tu bantuak indak jaran se mambao muatan barek. Inyo sarupo urang nekad jo muatan barek tu. Diambek siang hari dek patugas, dibaenyo bajalan malam hari. Kok ditilang dan mambayia maha, indak masalah deknyo. Kan mancari-cari masalah namonyo tu. Jadi den juo satuju muatannyo dibongka Mak,” panjang leba Uncu mananggapi apo nan dikatokan Mak Pono. “Kok muatannyo dibongka, tantu batambah karajo supir deknyo Mak,” kato Udin Kuriak. “Itu resiko. Manga mada. Manga indak patuah. Kabanyo indak itu se doh, salain dibongka, izin oto tu juo dicabuik,” kato Mak Pono. “Wah, babayo mah Mak!” baleh Udin. “Makonyo, supir jo induak samang oto prah tu harus patuah jo aturan. Ijan basibanak juo. Baa manuruik Tan Baro?” Kecek Mak Pono mintak pandapek ka konco palangkinnyo. “Urang awak ko suko malangga aturan. Itu juo dek ulah oknum patugas banyak nan bisa disogok atau dibao bamain. Cubolah patugas tu tegas jo aturan, ambo raso indak ka talok dek supir-supir tu malangga lai doh. Sia nan manyogok, lansuang dipacik an tangannyo dibao ka meja hijau, pasti jaran sadonyo mah,” hanyo itu nan bisa dikatoan Tan Baro. (eSPe St.Soeleman)