Manonton Musibah

Hari kapatang, koran ‘Singgalang’ tabik bantuak mancakau. Fotonyo gadang tinggi. Gambarnyo kabakaran nan tajadi di pasa raya. Baritanyo juo masalah kabakaran di situ. Indak itu se doh, di balakang ado pulo sahalaman isinyo foto-foto kabakaran itu sajo. Tantu sajo panampilan koran urang awak bantuak itu maundang paratian siapo sajo nan mancaliak. Apolai nan tabaka tu adolah pasa raya, yaitu pasa utamo dek urang-urang di nagari ko, pastilah banyak nan nio tau apo-apo se nan tabaka dan itu ado langkok baritanyo di koran ‘Singgalang’ kapatang. Dari barita-barita sarupo itu, komunitas lapau Uwo Pulin manjadikannyo bahan ota sambia mananti wakatu babuko. Nan dipaotakan indak hanyo masalah kabakarannyo se doh, tapi labiah banyak masalah kurenah urang rami nan manonton kajadian tu. Di koran ‘Singgalang’ dibaritakan baraso patugas pamadam kabakaran lah tabik suga mangatoan ka urang rami supayo ijan mandakek ka tampek-tampek nan tabaka, tapi indak dipadulian. Malah, urang-urang tu batambah manyasak ka muko. Ado nan mamoto pakai hape dan ado pulo nan sakadar baincik-incik se ka situ. “Heran den. Satiok ado musibah, masyarakaik manjadikannyo untuak objek tontonan. Musibah apo se lah, pasti ditonton urang. Baitu juo kabakaran kapatang tu, bagadincik urang manontonnyo. Dek karamiannyo, lah tagaduah pulo patugas untuak bakarajo mamadamkan api,” kato Uncu Labai. “Itu tandonyo urang awak awih hiburan Ncu!” Sorak Tacin Barain. “Eh, urang kanai musibah baa pulo dijadian objek hiburan? Lah tabaliak pasang namonyo mah. Itu tarompa nan jadi kupiah mah,” baleh Uncu. “Kalau manuruik den, itu tajadi dek ulah ingin tau dari masyarakaik awak sabana tinggi. Apo se lah kajadiannyo, urang awak pasti nio mancaliak lansuang, sudah tu dikatoan atau dipaotakan ka kawan-kawan lain. Nah, kalau ado nan maambiak foto jo hape, itu untuak dokumen dan ado pulo untuak dipalagak-an ka kawan-kawan baraso inyo mancaliak lansuang kabakaran tu tadi,” Angah Piyan maagiah tanggapan. “Pandapek Angah bisa ditarimo aka, tapi nan indak pas tu manga baincik-incik ka sinan sampai-sampai manggaduah ka patugas nan sadang bakarajo. Kok nyampang nyo semba dek oto pamadam kabakaran tu agak surang, beko disalahan pulo patugas. Ciek lai, saolah-olah awak tu indak ado raso-raso namonyo tu doh. Urang basirusuah baurai aia mato, tapi awak manonton bagalak-galak,” kato Uncu. “Kalau di kampuang den tajadi kabakaran lai banyak nan manolong Ncu?” Sorak Mak Pono. “Di siko lai pulo ado nan manolong. Ado nan manolong mangaluakan barang-barang dari toko, tapi dibao pulang,” baleh Kari Garejoh. “Kalau nan manolong bantuak itu ado dima-dima mah. Namonyo mancari kasampatan dalam sampik. Manangguak di aia karuah,” kecek Angah. (eSPe St.Soeleman)