Dalam duo hari ko barita angek datang dari Maligi, Pasaman Barat. Induak-induak dilawan dan dilalah pakai sanjato dek aparat kaamanan. Kasudahannyo ado nan patah dan ado pulo nan lari.
Bisa se dibayangkan, baa takuiknyo induak-induak mancaliak sanjato. Apolai kok mandanga latuihnyo, bisa tangga jantuang dibueknyo. Itulah nan dialami dek induak-induak di Maligi.
Dari barita nan dibaco dek urang-urang di lapau Uwo Pulin, masalahnyo bakaitan jo sangketo kabun sawit. Soal sia nan batua dan sia nan salah, tantu itu urusan pangadilan. Cuma sajo, komunitas lapau Uwo sabana indak satuju masalah bantuak itu disalasaikan jo kakarasan atau main kokang sanjato bagai.
“Baa pulo demo induak-induak dilawan jo sanjato bakokang. Iko lah bakalabiahan nampaknyo mah,” kecek Tacin Barain.
“Mungkin aparat tu manyangko jo sanjato takokang tu, induak-induak takuik, sudah tu indak malakukan aksi lai. Ruponyo pandapek bantuak itu salah. Samakin dilawan dek aparat, samakin manjadi-jadi. Barangkali kini indak hanyo induak-induak nan salapan baleh tu se lai nan malawan, tapi bisa-bisa lah sakampuang,” kato Udin Kuriak mananggapi apo nan dikatoan Tacin tadi.
“Kakarasan indak salalu bisa dilawan jo kakarasan doh Din. Kadang-kadang kakarasan tu bisa kalah jo kalembutan. Jadi urang emosi jan dilawan pakai emosi pulo, tapi lawanlah jo lunak atau jo caro maagiah pangaratian, pasti salasai. Atau minimal indak bakapanjangan lai masalahnyo,” kecek Angah Piyan.
“Bayangkan dek Angah. Aparat kaamanan tu barangkali lah jalan anak atau bahkan jalan cucu dek induak-induak tu, dan itu pulo nan dilawan jo badia bakokang. Apo indak pernah tabayang dek aparat awak baraso nan dilawan tu adolah induak atau neneknyo surang. Ka bara banalah dayo induak-induak nan lah gaek-gaek tu,” kecek Tacin baliak.
“Sabananyo, kalau awak lai paham jo papatah Minang, indak ado kusuik nan indak salasai, karuah nan indak tajaniahan, den raso kajadian tu indak ka tajadi doh. Saandainyo pihak-pihak pamarentah di situ lai arif jo sagalo potensi nan ka tajadi, harusnyo sangketo lahan tu disalasaikan dari dulu. Ibarat bisua, katiko ketek diubek atau dicukia supayo indak batambah gadang. Kalau lah gadang, sakiknyo indak tabedo,” Mak Pono lah sato pulo mangecek.
“Jadi manuruik Mamak sia nan harus batangguangjawek?” Tanyo Tan Baro.
“Kalau pandapek den, pamarentah di situ nan harus batangguangjawek. Karano kabanyo, masalah lahan tu lah lamo tajadi. Kajadian kini tu hanyolah puncak dari masalah lamo,” hanyo itu jawek Mak Pono nan disambuik jo angguak-angguak kubin dari Tan Baro.
“Aratinyo, kalau dicarian panyalasaiannyo dari dulu, indak akan tajadi nan bantuak kini ko? Aparat kaamanan indak paralu manggendong sanjato ka situ? Iyo baitu Mak?” Tanyo Tan Baro baliak.
“Yo, itulah kiro-kiro Tan!” Jawek Mak Pono singkek.
(eSPe St.Soeleman) |
Postingan
Tidak ada komentar:
Posting Komentar