Dari Muncuang Buayo ka Muncuang Rimau

“Galodo Ancam Padang’. Barita ko manjadi bahan ota di lapau Uwo Pulin pagi kapatang. Baa ka indak, urang-urang tu mangatoan lah takapik dek musibah. Timba baliak musibah maancam. Salamo ko eboh akan ado sunami dari lawik. Kini lah batambah pulo jo ancaman galodo dari bukik.

“Kok dulu takuik wak limo puluah, kini lah saratuih mah, Tan,” kato Kudun.
“Baa tu?” Tanyo Tan Baro.
“Dulu ciek se ancaman nan mambuek wak takuik yaitu sunami. Kini lah ado lo ciek lai, yaitu galodo,” jawek Kudun.
“Iyo mah Tan. Salamo ko dek takuik jo sunami, banyak warga nan pindah ka Kuranji atau ka tampek nan labiah tinggi. Kini, tibo lo ancaman galodo. Ibaratnyo, lapeh dari muncuang buayo, dinanti dek muncuang rimau,” kecek Udin Kuriak.
“Itulah, kalau Allah nan mambuek kaputusan, indak surang juo nan bisa mahalanginyo doh. Mudah-mudahan musibah nan manakuik-an tu indak tajadi di siko,” mangecek pulo Malin Kacindin.
“Yo, samo-samo badoa se lah wak, supayo jauah dari sagalo musibah jo bancano. Lah cukuik rasonyo musibah nan awak alami salamo ko, ijan ado juo untuak maso-maso nan ka datang lai,” kecek Inyiak Kurai.
“Sabananyo awak indak usah lari. Kalau memang nasib mati dek bancano, dima se bisa. Kan ado dulu kajadian mah, dek takuik jo gampo, lari ka Jakarta. Katiko suasana aman, baliak ka Padang, eh sampai di siko mati juo dek gampo,” sambuang Malin.

“Garisan iduik awak ko lah ado surang-surang mah,” mangecek pulo Tacin Barain.
“Hebat lo Tacin yo. Tapi, kalau dinanti se, itu namonyo bunuah diri. Awak ko disuruah bausao Cin. Kalau memang ado ancaman dari lawik, yo jauahi tapi pantai,” kato Uncu Labai.
“Tapi, iko kanyataannyo, dijauahi lawik dan lari ka dakek bukik, kini galodo pulo nan maancam. Apo indak lapeh dari muncuang buayo, tasarongoh ka muncuang rimau dek Uncu namonyo tu?” Kato Udin.
“Tapi katanya daerah ini supermarket bencana, ya tentulah begitu,” mangecek pulo Sutan Subarang.
“Jadi, Sutan pai balanjo bancano dari Jawa niin kamari mah yo,” potong Mak Pono.
“Ya, enggaklah Mak. Kan istri saya orang sini,” jawek Sutan Subarang.
“Jadi apo nan musti awak lakukan ko lai? Lah di lawik muncuang buayo mangango, di gunuang muncuang harimau pulo nan sadang takambang,” Tanyo Udin.
“Pabanyaklah ibadah dan doa. Ijan babuek nan buruak-buruak juo. Kok bautang musti dibayia,” tibo-tibo Uwo Pulin mangecek sambia malap meja.
“Batoh Wo. Kan lai kami bayia utang mah. Kan alah bak kecek urang tuo-tuo, lansai utang dek baansua,” kato-kato Uwo ditanggapi dek Tacin Barain. (eSPe St.Soeleman)

sumber