Manambah Karajo

“Iko manambah karajo nampaknyo mah!” “Apo tu? Sia nan manambah karajo? “Maso iyo patani disarankan sato bapolitik. Untuak paisi paruik se lah sasak angoknyo dek mancaria pagi jo patang, tu ka disuruah pulo bapolitik.” “Sia nan manyuruah?” “Iko ha, apak ko. Mantang-mantang inyo urang politik, lah disuruah lo patani untuak sato bapolitik.” Baitulah ota antaro Mak Pono jo Angah Piyan nan duduak basabalahan di palanta lapau Uwo Pulin. Matoari baru se manampakkan diri dari baliak bukik arah timur Kota Padang. Jalan di muko lapau Uwo indak sarami hari biaso. Namonyo se hari Akaik, tantulah indak banyak urang nan kalua rumah. Apolai anak sikola lah salasai pulo manarimo rapor, otomatis masih banyak nan lalok minyak di rumah urang tuonyo. “Oh, barita iko nan Mamak mukasuik? Wajar se patani sato bapolitik tu nyo, supayo bisa pulo mampajuangkan hak-haknyo. Itu nan den baco tadi,” kecek Angah Piyan. “Ha....ha...., iko nan den indak sasuai. Kalau ka awak juo mampajuangkan nasib ka pamarentah, untuak apo gunonyo wakia rakyaik nan lah wak pilih. Itu kan nio mailak dari karajo namonyo mah,” baleh Mak Pono. “Batua mah Ngah. Biaya untuak pamilu mamiliah apak-apak jo ibuk-ibuk nan tahormat tu triliunan. Kalau bantuak itu modenyo, ijankan galeh balabo, pokok se indak babaliak doh,” Kudun lah sato pulo mangaluakan pandapeknyo. “Allah lah maningek-an awak kasadonyo, suatu karajo kalau indak dikarajoan dek ahlinyo tunggu kehancuran. Nah, satiok awak lah ado bidang-bidang karajo. Anggota dewan salah satu tugasnyo untuak mampajuangkan awak-awak ko. Nan awak tantu bakarajo pulo sasuai jo bidang karajo awak. Kalau pagawai, karajolah di kantua elok-elok. Kalau manggaleh, ijan mampamainkan timbangan dan kalau patani yo batani se lah elok-elok supayo dapek hasia nan balipek gando,” Uncu Labai indak katinggalan basuaro. “Nah, kalau bantuak itu, kan indak pas patani disuruah bapolitik doh kan Ncu?” Tanyo Mak Pono. “Harusnyo nan manyuruah tu mampatimbangkan faktor lain. Kabanyakan patani kan bakarajo untuak panyambuang iduik. Kalau disuruah pulo bapolitik, jo apo kaluarga nyo agiah makan? Tapi kalau patani nan lai matang ekonominyo dan nio bapolitik, silahkan. Indak ado larangannyo doh. Umpamonyo patani badasi atau nan punyo lahan baribu hektar. Satiok warga negara punyo hak untuak bapolitik. Kan iyo bantuak itu ndak Tan Baro? Kok salah den, tolong luruihan,” jawek Uncu sambia mintak pandapek ka konco palangkinnyo. “Iyo, batua mah. Untuak apo bapolitik kalau galang-galang manggalitik se tiok sabanta. Untuak apo bapolitik kalau utak panik untuak biaya sikola anak. Untuak apo bapolitik kalau pitih ndak ado untuak maubek kaluarga nan sakik. Jadi, politik tu tagantuang jo situasi, kondisi dan kasadaran surang-surang. Kalau Mak Pono atau Uncu nio bapolitik, silahkan! Indak ado larangan doh,” hanyo itu nan bisa dikatoan Tan Baro. Matoari samakin maninggi, ota samakin malaweh kamano-mano. Maklum, hari tu saluruh nan ado di lapau tu indak pai karajo. (eSPe St.Soeleman)