Barabab ka Talingo Kabau

“Tiok tahun iko se nan dikatoan dek pamarentah. Lah manyambua-nyambua aia liua dek mangecek, tapi banyak nan indak mandanga dek kapalo sikola.” “Apo juo lai Ngah. Pagi-pagi lah bantuak kuciang makan tulang tadanga di den.” “Tahun ajaran baru dilarang melakukan pungutan. Tidak dibenarkan sekolah memungut iyuran. Itu ka itu se tiok tahun. Tapi kanyataannyo maa? Ado-ado se caronyo mamintak pitih ka masyarakaik atau urang tuo murik. “Ooooh....., itu. Zaman kini indak ado nan perai doh Ngah. Sabanta lai takantuik jo maludah mambayia lai mah.” Baitulah ota antaro Angah Piyan jo Udin Kuriak di lapau Uwo Pulin pagi kapatang. Ota bamulo dari barita koran Singgalang nan mangatoan rumah sikola indak buliah mamunguik pitih untuak anak-anak baru masuak. “Satuju den jo pandapek Udin. Kini indak ado nan perai lai doh Ngah. Masuak kakuih se mambayia. Kajamban kanai saribu, buang aia gadang duo ribu atau saribu limo ratuih. Apolai iko masuak sikola. Ilimu nan ka diagiah dek guru, maso iyo perai-perai se,” Mak Pono mulai mangipeh. “Ijan kancang ka pitih Mak. Nan dimukasuik dalam barita tadi tu adolah sikola-sikola milik pamarentah atau sikola negeri. Kalau sikola swasta, itu tasarah dek pangurus yayasannyo lah. Sikola milik pamarentah ko lah ado anggaran atau biayanyo,” kato Angah. “Ha...ha...., iyo lo tu mah. Jan kancang ka pitih Mak. Itu mah dek ulah kancang ka pitih, lah banyak nan masuak tansi. Itu kapatang nan kontan bana dek Mamak nan masuak. Itu dek ulah pitih juo mah. Jumlah pitih indaklah banyak bana doh, tapi awak baunjun-unjun ka panjaro. Kaluarga jo sanak sudaro sudah dibueknyo. Urang masuak panjaro jo pitih bamiliar atau batriliun, tapi awak Cuma dek ulah rimih-rimih se nyo,” potong Kari Garejoh. “Tapi kan indak dek pungutan tahun ajaran baru doh,” baleh Mak Pono. “Kalau soal pungutan tahun ajaran baru tantu urusan kapalo sikola jo guru-gurunyo,” sambuang Kari. “Kadang-kadang pamarentah ko bak cando barabab ka talingo kabau nampak di den. Bia rancak bana bunyi rabab, nan kabau ka basiliengah se nyo. Bia maruwok muncuang kapalo daerah atau pajabaik mangatoan baraso indak buliah ado pitih-pitih pungutan untuak masuak sikola, namun banyak juo nan indak mandanga,” Uncu Labai lah sato pulo mangaluakan pandapeknyo. “Ka talingo kabau barabab tantu iyo Ncu?” Tadanga sorak Tacin Barain. “Yo, itulah umpamonyo. Indak didanganyo doh. Kadang masuak talingo suok, kalua talingo kida bagai. Bak kecek-kecek awak dulu, bantuak urang naiak oto ka Piaman. Katiko naiak dari Padang iyo indak mambayia doh, tapi baru se bajalan oto agak sakilo duo kilo lah tibo se agen atau sitokar memintak pitih. Dek kapalo sikola ado-ado se alasannyo. Samati-mati angin katonyo itu adolah kaputusan urang tuo murik malalui komite,” baitu Uncu mencubo manarangan ka Tacin sarato kanti-kantinyo nan samo minum pagi tu di lapau Uwo. (eSPe St.Soeleman)