Palanta Lapau-Kabua gambar

“Baa kaba Mak? Agak lain manuang pagi ko nampaknyo mah.” Baitu tanyo Tan Baro nan baru masuak lapau pagi kapatang. Tan Baro memang agak talambek ka lapau Uwo Pulin, karano kunci kontak motornyo indak tantu dima lataknyo. Tu mah, dek cari ka cari, ruponyo kunci kontak talatak di ateh tipi. “Kok kini iyo agak kabua gambar mah Tan!” Hanyo itu jawek Mak Pono. “Kabua baa pulo?” Tanyo Tan Baro baliak. “Kan lah baco koran Tan Baro kapatang ndak?” Mak Pono baliak batanyo. “Lai, baa tu?” Jawek Tan Baro. “Nah, kan kapatang wak den indak sempat mambaco koran dek pulang kampuang dan baru kini bisa mambaco. Lah den paratian barita koran kapatang tu, iyo kabua gambar den dibueknyo,” kato Mak Pono. “Makonyo Mamak ijan mambuek gambar di ateh karateh koran. Bali karton manila putiah ciek, buek gambar di situ, pasti jaleh mah,” tibo-tibo apo nan dikatoan Mak Pono dipotong dek Kari Garejoh. “Indak itu doh Ri. Nan den mukasuik kabua gambar tu sasuai jo barita koran ‘Singgalang’ hari Sabtu kapatang baraso panarimoan pagawai diantian. Nah, Kari kan tau den punyo kamanakan nan nio bana manjadi pagawai. Alah duo kali sato tes, tapi alun barasil lai,” kato Mak Pono. “Karajo kan indak manjadi pagawai se ciek di nagari ko doh Mak!” Semba Tan Baro. “Batua. Tapi awak kan lah samo tau baraso pagawai adolah anak ameh dek pamarentah di nagari ko. Nah, kami di dalam kaluarga nio bana ado salah surang kamanakan bisa manjadi pagawai, supayo bisa mambangkik batang tarandam dan panjapuik gadaian lamo. Kalau indak ado nan manjadi pagawai, di kampuang den tu leceh se awak dek urang. Indak disagani stek juo doh,” baitu Mak Pono manjalehan ka kawan-kawannyo. “Banyak profesi lain nan bisa maangkek harago diri Mak. Indak hanyo manjadi pagawai, manjadi pangusaha atau pai marantau dan sukses di rantau bisa disagani awak dek urang. Atau sato mancalonkan diri untuak anggota dewan taun muko. Pokoknyo indak ciek jalan untuak diharagoi urang,” Angah Piyan lah sato pulo basuaro. “Iyo, tapi di kampuang den tu lain Ngah. Pagawai saolah-olah manjadi profesi paliang hebat. Makonyo urang di situ juo balomba-lomba mancari minantu pagawai. Ado pantunnyo mah. ‘Urang babiduak dari balai. Bialah capuak asa lai pagawai’. Baitu banalah!” Kecek Mak Pono baliak manjalehan, pakai pantun pulo lai. “Suruah se mahonor dulu Mak. Kan cuma taun muko nan indak ado panarimaan pagawai, mano tau taun ciek lai ado dek Mamak. Atau pagawai baru diangkek dari tanago honor,” kato Tan Baro maagiah saran ka konco palangkinnyo. “Tambah kabua gambar di den mah. Sia nan ka manolong supayo kamanakan den tu bisa mahonor. Tanago honor kini kalau indak ado urang dalam nan manolong, indak ka bisa gai doh,” baleh Mak Pono. Baitulah ota pagi kapatang di lapau Uwo. Karano hari libur, urang tu bisa balamo-lamo duduak di palanta lapau. (eSPe St.Soeleman)