Mancaliak barita bajudul ‘Ganti Rugi Alai By Pass Sudah Selesai’ di koran ‘Singgalang’, ado nan takana dek Kari Garejoh. Saolah-olah bantuak mambali kacang goreang atau mambali lontong nampaknyo.
Mambali kacang goreang agak satekong, sudah tu dibae duduak di tampek urang manggalehnyo memang masih bisa mintah tambah ciek jo duo. Baitu juo mambali lontong masih bisa mintak tambah kuah bagai. Sapilik-pilik urang manjuanyo pasti masih amuah maagiah tukuak tambahnyo.
Mambaco barita tu, lah bisa disimpulkan baraso masalah ganti rugi tanah untuak jalan tu lah salasai. Saluruh urang punyo tanah jo bangunan lah dibayia gantiruginyo dek pamarentah. Tapi kini tibo-tibo se ado nan mintak tambah.
“Kalau den nan manjadi walikota, indak ka namuah gai manambah doh. Karano kato partamo kato batapek-i, kato kaduo tantulah kato bacari-cari. Baa manuruik Angah tu?” Baitu kato Kari Garejoh sambia mintak pandapek ka konco palangkinnyo.
Angah Piyan nan indak tau masalahnyo indak sugiro maagiah tanggapan. Malah sabaliaknyo, batanyo baliak masalah apo nan ditanyo Kari. Mako dijalehanlah dek Kari baraso ado di antaro urang punyo tanah untuak jalur evakuasi Alai By Pass nan mintak tambahan ganti rugi.
“Kalau inyo mintak tambahan itu buliah-buliah se. Itu kan hak urang-urang tu. Masalahnyo kini apo pamarentah amuah manambah? Saandainyo pamarentah manambah atau manukuak ganti ruginyo, pasti akan datang masalah gadang baliak. Picayolah. Urang lain nan samo-samo manarimo ganti rugi pasti indak sanang. Inyo pasti ka mamintak tambahan pulo. Kasudahannyo bisa tabayia duo atau tigo kali lipek gai tanah tu mah. Baa manuruik Tan Baro?” Baitu Angah Piyan mananggapi apo nan dikatoan Kari tadi.
“Batua! Surang se diagiah tambahan pasti maundang reaksi. Karano itu ambo satuju jo pandapek anggota dewan ko, jan sampai ditambah. Anggaran untuak itu lah abih,” hanyo itu jawek Tan Baro.
“Kalau urang punyo tanah basikareh baa?” Tanyo Kari.
“Bia se lah kok ka basikareh bagai. Proses gantirugi tanah tu tantu ado surek-sureknyo. Kalau memang indak bisa diajak kompromi, tampuah se jalur hukum. Tapi, kok dapek adolah pangaratian dari nan punyo tanah andaknyo. Kalau memang iyo lah salasai masalah ganti rugi tu, untuak apo juo mintak tukuak atau mintak tambah bagai. Jalan tu kan indak untuak pamarentah doh mah, tapi untuak kapentiangan urang banyak. Bayangkanlah ratusan ribu urang nan kadisalamaik-an malalui jalan itu,” kecek Tan Baro baliak.
“Tapi den agak ragu Tan!” Tadanga kato Mak Pono.
“Ragu aponyo?” Tanyo Tan Baro.
“Apo iyo lai cukuik ganti rugi tu diagiahan dek pamarentah atau panitianyo ka urang punyo tanah? Lai indak ado pulo pitih ganti rugi tu nan tacicia dek mambaonyo. Kalau ado nan tacicia di jalan atau di tampek urang manjua oto, tantu kurang ganti rugi tu nyo tarimo dek warga dan itulah sababnyo mereka mintak tambahan ganti rugi,” Mak Pono manjalehan mukasuiknyo.
“Babaiak sangko se lah awak. Kini kan bulan puaso,” baleh Tan Baro.
Baitulah ota di lapau Uwo Pulin sapulang dari sumbayang Tarawih tadi malam. (eSPe St.Soeleman) |
Postingan
Tidak ada komentar:
Posting Komentar