Urang Jaek-Singgalang

Udaro Kota Padang taraso sadang elok atau indak beda dari pagi-pagi sabalunnyo. Jalan-jalan nampak jauah labiah langang. Walau kapatang tu hari Sinayan, hari partamo masuak karajo. Angkutan kota tampak bainsuik-insuik mancari panumpang. Padohal di pagi-pagi sabalunnyo justru angkot nan dikaja panumpang. “Assalamualaikum. Baa din? Apo barita angek kini?” Uncu Labai nan baru masuak lapau lansuang se batanyo ka Udin kuriak. Kabatulan Udin sadang mambaco koran ‘Singgalang’. “Kini agak landai Ncu,” jawek Udin. “Landai se sadonyo?” Tanyo Uncu nio kapastian. “Kalau sakadar untuak ota pagi se lai juo ko ha. Banyak urang jaek nan manjadi pajabaik di daerah,” baleh Udin. “Mukasuiknyo apo tu Din?” Tanyo Uncu. “Biasolah, iko ado kaitan jo korupsi dan karajo mahalalkan sagalo caro. Sabab nan mangecek ko urang ka-pe-ka,” jawek Udin. “Oh, kalau korupsi ndak ka namuah abih gai di nagari awak doh. Karano pajabaik awak paawih. Nah pitih tu kan ibarat aia lawik, samakin diminum samakin awih dibueknyo,” hanyo itu komentar Uncu. “Ado nan labiah parah Ncu. Untuak manjadi kapalo daerah surang calon kan maabihan pitih bamiliar-miliar. Kalaulah tapiliah tantu nan diusaoannyo baa supayo baliak modal. Nah ikolah nan manjadi sumber korupsi tu. Kabara banalah gaji jo tunjangan kapalo daerah sabulan. Untuak mancari pitih pambaliak modal tu yo tapaso pakai sagalo caro. Main aka dan main tembak jenggo se,” Tan Baro mangaluakan pandapeknyo. “Indak untuak manjadi kapalo daerah se doh Tan. Kadang untuak manjadi pajabaik karir juo ado nan mambayia ka atasan atau ka kapalo daerah,” potong Angah Piyan. “Iko nan labiah parah lai, baduo kanai. Kapalo daerah malakukan pungli atau uang sogok, nan anak buah batanam bibik korupsi pulo,” baleh Tan Baro. “Jadi sasuai jo kecek koran ko, itulah urang-urang jaek nan jadi pajabaik di nagari ko, mulai dari pamarentah paliang randah sampai nan tinggi,” kato Angah. Baitulah ota di lapau Uwo pagi kapatang. Karano matoari lah samakin tinggi juo, urang-urang tu mulai bubar untuak pai karajo. (eSPe St.Soeleman)