Palanta-Singgalang

Es-ka-es-de

Nampaknyo pak gubernur lah mulai berang dek ulah parangai sabagian urang di nagari ko. Banyak nan mangaku-ngaku dakek hanyo untuak mandapek proyek. Di barita koran ‘Singgalang’ hari Sabtu kapatang, pak gubenur manyuruah anak buahnyo supayo indak mananggapi urang-urang nan sok-sok dakek jo inyo. Malah, kalau paralu keceknyo usia se kalau ado nan datang mamintak proyek bagai. “Memang banyak manusia nan sarupo itu kini. Inyo mangaku sok kenal dan sok dakek jo pajabaik supayo dapek proyek,” kato Angah Piyan. “Indak di awak dan indak di urang doh. Asa lai ka ado untuangnyo pasti banyak nan mangaku-ngaku dunsanak, mangaku sakampuang, samo sikola atau sapamainan bagai jo pajabaik nan sadang mamacik,” kato-kato Angah ditanggapi dek Mak Pono. “Kok tibo di Ajo, balancik-lancik an rumahnyo jo gubenur atau jo bupati mah,” potong Udin Kuriak. “Tapi jo si atuik nan tukang panjek karambia kan indak kenal doh, walau rumahnyo babateh dindiang,” kato Mak Pono. “Oto tagak jan diantak Mak. Bakapeh iduang beko!” Baleh Ajo Tondeh. “Iko indak masalah oto tagak atau oto bajalan bagai doh Jo. Iko kanyataan di nagari awak. Siapo sajo nan sadang mamacik pasti banyak nan mangaku kenal dakek atau malah indak saketek pulo mangaku dunsanak. Ado raso bangga kalau urang nan awak kenal mamacik jabatan pentiang. Kan iyo baitu ndak Ngah?” Baleh Mak Pono. “Batua. Ikolah nan mambuek pak gubenur agak berang nampaknyo. Karano ado urang-urang tatantu nan mangatoan dakek jo baliau, sudah tu mintak proyek ka pajabaik-pajabaik di bawah gubenur,” jawek Angah. “Tapi, kalau indak ado api tantu indak ado asok, Ngah. Urang-urang nan barani bantuak itu pasti dapek angin dari gubenur atau saindak-indaknyo dari urang-urang di sakaliliang gubenur tu. Awak kan ndak lo tau sia sajo urang nan ado di sakuliliangnyo,” Kari Garejoh lah sato pulo mangaluakan pandapeknyo. “Batua juo analisa Kari mah. Biasonyo memang urang-urang di sakuliliang kapalo daerah tu bana nan mambuek suasana sarupo itu. Walau inyo bagarah, tapi dek si too lah iyo pulo. Lah datang pulo ka pajabaik-pajabaik nan punyo proyek. Dikatoan untuak kamanusiaan atau untuak lain-lainnyo lah,” kato Angah. “Kabiasaan-kabiasaan bantuak iko nan harus diantisipasi. Manusia-manusia nan tadinyo manjadi tim sukses di pamiliahan kapalo daerah juo ado sarupo itu. Ibaraiknyo mintak baleh jaso, lantaran maraso lah bajaso,” giliran Tan Baro pulo basuaro. “Jadi baa maatasinyo?” Tanyo Udin. “Ijan sampai ado janji bagi-bagi proyek katiko proses pamilihan. Karano bagi-bagi proyek tu samo se jo ka-ka-en mah,” jawek Tan Baro. “Kalau nan es-ka-es-de tu baa lo Tan?” Tanyo Mak Pono. “Pajabaik nan didatangi harus barani mangatoan indak ka urang-urang tu. Ijan dilayani dan bak kato gubenur tu usia se,” jawek Tan Baro. “Kok iyo urang suruahan kapalo daerah beko baa? Kan bisa baliak awah panabangan deknyo,” kato Udin. “Itu gunonyo pakakeh komunikasi. Kan tingga nanyo se ka kapalo daerah lai,” kato Tan Baro. Baitulah ota di lapau Uwo Pulin pagi sampai siang kapatang. Maklum hari libur urang-urang tu bisa balamo-lamo duduak di lapau. Malah nan lah pulang ado juo nan babaliak hanyo untuak sakadar pai duduak-duduak se. (eSPe St.Soeleman)