Sudah Naiak, Naiak lo Liak

Bantuak maukua kain saruang, belok-belok di situ se ota urang-urang di lapau Uwo Pulin. Walau banyak masalah jo paristiwa nan tajadi di nagari ko, tapi mampaotakan pagawai ado taruih. Di dalam kapalo urang-urang di palanta lapau tu, pagawai batua-batua manjadi anak ameh atau anak kasayangan. Balabiahan bana paratian pamarentah ka inyo. Padohal di nagari ko indak hanyo pagawai nan paralu paratian, tapi saluruh manusia nan barangok. “Bantuak pagawai se nan punyo nagari ko nampak di den. Inyo ka inyo se nan jadi paratian pamarentah. Urang lain sarupo awak-awak ko indak dipadulian. Saandainyo ado nomor urutannyo, awak-awak panduduak nomor bara ko lah yo?” Pandapek bantuak itu kalua dari muncuang Mak Pono. Mak Pono tamasuak manusia paliang indak suko jo caro-caro pamarentah nan bakalabiahan paratian ka pagawai. Karano di nagari ko masih banyak urang nan labiah paralu paratian. Di nagari ko ado patani, ado nalayan, ado tukang, supir, tukang angkek sarato lainnyo. Rato-rato iduik urang bantuak itu banyak nan indak baruntuang. Kok sakik tangguang surang. Kok lapa cari surang makanan. Sadangkan pagawai, gaji atau makanan lah dijamin dek pamarentah. Baitu juo saandainyo sakik, lah ado pulo jaminan. “Apo juo lai Mak. Karajo awak se lah pikiakan. Iko tahun ajaran baru lah tibo pulo, tantu paralu pitih banyak pulo. Minimal paralu mambali sipatu atau baju anak untuak pangganti nan lusuah dipakai satahun ko,” kato-kato Mak Pono ditanggapi dek Tan Baro. “Yo baruntuang bana pagawai nagari ko nampak di den. Tiok taun gaji batambah. Sudah naiak, naiak lo liak. Kini naiak sapuluah parosen, taun bisuak naiak lo liak sabanyak itu. Taun di mukonyo tantu juo naiak,” kato Mak Pono. “Biaso se tu nyo. Pagawai tu kan anak kasayangan pamarentah,” baleh Tan Baro. “Buliah-buliah se punyo anak kasayangannyo Tan, tapi jan inyo se ciek nan diparatian. Caliak-caliak juo panduduak lain nan karajonyo batani, nalayan, buruh angkek, tukang, wartawan, guru honor jo pagawai honor atau profesi lainnyo. Kan nan lain tu juo warga negara Indonesia mah. Dalam sejarah nagari ko indak pagawai nan bajuang untuak kamardekaan doh, tapi saluruhnyo, tamasuak urang-urang tani, tukang angkek bagai,” kecek Mak Pono. “Itu kan kato Mamak. Kato pamarentah lain pulo. Inyo labiah sayang ka pagawai, kamanga awak?” Giliran Kari Garejoh basuaro. “Lah tabaliak pasang nampaknyo pamarentah mah. Bakalabiahan bana. Jadi, wajar-wajar se nagari ko tambah lamo tambah rusak,” kato Mak Pono. “Rusak baa lo Mak?” Tanyo Udin Kuriak. “Nan korupsi kabanyakan urang punyo gaji dari pamarentah. Bara banyaknyo urang-urang hebat nan salamo ko makan gaji gadang dari pamarentah, mancingkuak di panjaro dek Udin? Itu dek ulah dimanjo-manjo mah. Tiok dinaiak-an gaji dikatoan juo ndak cukuik, dibae korupsi. Padohal inyo lupo baraso pitih tu bantuak minum aia lawik. Samakin diminum, samakin awih dibueknyo,” baitu panjalasan Mak Pono nan pagi kapatang tu sabana indak lamak hati mancaliak barita di koran ‘Singgalang’ nan mangatoan gaji pagawai taun muko naiak lo liak sapuluah parsen. (eSPe St.Soeleman)