Palanta Lapau-Angan-Angan

Padang kalam. Kok dicaliak-caliak lah sarupo malam, tapi baru jam satangah limo. Urang-urang baru salasai Sumbayang Ashar. Baitu juo Uncu Labai dan kawan-kawannyo salasai sumbayang di musajik lansuang se ka lapau Uwo Pulin untuak duduak-duduak sambia mananti wakatu babuko.  Kalam dan buruaknyo cuaca memang lah taraso sajak duo hari ko. Hujan indak bakatantuan se tibonyo. Cuaca bantuak itu acok pulo mambuek rusuah hati. Di lapau Uwo, kagiatan urang-urang tu hanyolah mambaco koran, maota dan ado pulo nan main domino atau main catua bagai. Pokoknyo, marintang-rintang wakatu mananti babuko tibo. “Wacana ka wacana. Sajak dulu hanyo itu se nan diagiah tau ka warga ko. Lah kanyang dek wacana se urang-urang ko,” baitu kato Kari Garejoh sambia maampehan koran ‘Singgalang’ di muko inyo duduak. “Apo ko Ri? Bulan puaso mareh-mareh, bata puaso deknyo!” Mak Pono managahan. “Iko ha. Sajak dulu pamarentah di siko mambuek wacana se nan pandai. Contohnyo bus massal ko ha. Lah batahun-tahun manjadi wacana tapi indak ado bukti. Kini diwacanakan lo liak,” jawek Kari mampacaliak-an barita nan bajudul ‘Bus Massal Diwacanakan Lagi’. “Oh, di kampuang den namonyo angan-angan mah. Kadang-kadang urang baangan-angan ko kan indak paralu lo maukua bayang-bayang jo kamampuan doh. Contohnyo urang sakik. Lah jaleh, damam, karongkongan sakik, tapi nio juo makanan bamacam-macam. Ado nio gulai tunjang, ado nio ikan baka, ado nio sup kaki kambiang, ado nio sate, martabak dan lainnyo. Pokoknyo raso kadimakan sadonyo,” kato Mak Pono. “Nan parahnyo sakiknyo darah tinggi, tapi baangan-angan pulo makan gulai kambiang. Dek angan-angan se bisa batambah juo naiak tensinyo. Ha....haaa....,” potong Tacin Barain. “Lai ado angan-angan pamarentah tu, alah juo mah Ri. Jan berang pulo lai. Kok nyampang ditanyo dek kapalo daerah lain beko kan ado jaweknyo, baraso di nagari ko ado pulo bus massal, tapi dalam angan-angan,” potong Tan Baro. “Jadi, baumbuak jo itu se warga ko?” Tanyo Kari. “Yo, jan gadang pulo incek mato Kari ka ambo. Kan indak ambo nan mambuek program tu doh mah,” baleh Tan Baro. “Tapi, kecek urang-urang sukses, sagalo nan ka dibuek tu dimulai dari angan-angan,” lah mangecek pulo Angah Piyan. “Kalau lai bausao sudah itu dan maukua bayang-bayang sapanjang badan indak baa doh Ngah. Tapi kalau hanyo wacana ka wacana atau angan-angan se, sampai batalua itiak jantan indak ka bisa gai tu doh,” baleh Kari. (eSPe St.Soeleman)