Nan Randah di Balakang!-Palanta

Agak baiyo bana ota urang di lapau Uwo Pulin pagi kapatang. Itu dek ulah barita koran ‘Singgalang’ nan mambaritakan pagawai-pagawai honor ka diangkek manjadi pagawai panuah bulan di nan ka tibo. Harapan manjadi pagawai memang dipunyoi dek saluruh urang nan salamo ko manjadi tanago honor. Karano manjadi pagawai dianggap karajo paliang sanang. Karajo santai, gaji gadang, tunjangan banyak, jaminan iduik ado pulo. Kok nyampang sakik ngilu paniang indak paralu susah-susah mancari pitih untuak baubek, karano memang lah dijamin dek pamarentah. Malah, di maso gaek, pansiun beko juo masih manarimo pitih tiok bulan. Di koran kapatang dikatoan anam puluah tujuah ribu tanago honor ka diangkek manjadi pagawai nagari bulan muko. Cuma jatah manjadi pagawai tu hanyo untuak nan tamatan sarjana atau paliang randah tamatan diploma satu. “Iko kaba baiak nampaknyo mah Tan!” Sorak Uncu Labai. “Nan ma, Ncu?” Tanyo Tan Baro. “Itu ha, anam puluah tujuah ribu tanago honor diangkek manjadi pagawai nagari bulan muko. Tacapai juo cito-cito kamanakan den nampaknyo,” jawek Uncu. “Kamanakan nan ma Ncu?” Tanyo Udin Kuriak. “Nan mahonor di kampuang tu ha,” jawek Uncu. “Tamaik aponyo?” Tanyo Udin baliak. “Tamaik es-em-a,” jawek Uncu baliak. “Oh, kalau tamaik es-em-a ancik lu. Kini untuak sarjana, paliang randah tamatan diploma satu,” kecek Tan Baro. “Tamatan es-em-a cukuik manjadi pe-te-te se dulu. Itu aturannyo Ncu!” Angah Piyan lah sato pulo mangecek. Maklum, sabalun sampai ka tangan Tan Baro, barita tu lah dibaco talabiah dulu dek Angah. “Bantuak urang babarih mah Ncu. Kan lai takana mode barisan awak wakatu sikola ndak? Nan tinggi di muko, nan randah di balakang,” kecek Udin. “Oh, indak adil namonyo tu doh,” Uncu protes. “Soal adil atau indak adil, tantu di pangadilan Ncu. Tapi, dari barita nan den baco tadi, kecek pamarentah kini nan lah manjadi pagawai tu banyak tamatan es-el-te-a. Dek ulah banyaknyo tamatan es-el-te-a, kualitas pagawai manjadi kurang. Inyo cuma datang di tampek karajo dan duduak. Banyak binguang daripado karajo,” kato Angah manjalehan apo nan tadi dibaconyo. “Kalau bantuak itu, tantu kamanakan den ka honor se taruih,” kato Uncu baliak. “Yo, kalau indak kuliah, tantu nasibnyo cuma sampai pe-te-te. Jadi tarimo selah nasib punyo sikola randah Ncu. Bak kecek Udin tadi, nan randah di balakang se lah dulu. Kalau nio di muko juo, tantu patinggi badan. Aratinyo bana, kok nio capek manjadi pagawai, sambuang sikola dulu. Kan banyak tampek kuliah kini mah. Indak paralu ka Jawa bana doh. Di kampuang Uncu kan juo ado tampek kuliah,” jawek Angah. (eSPe St.Soeleman)