SOGOK MANYOGOK

“Sogok-manyogok, manyogok lah Pak oi di jandela di baliak tirai lah lamo kito ndak batamu pandang sogokkanlah Pak pitih saserai” “Apo pulo lagu Uncu ko? Tukang bueknyo lah ruruik abuak dek mamikiakan syairnyo, tapi Uncu lamak se manuka-nuka,” Mak Pono lansuang se mamparantian Uncu Labai nan sadang manyanyi. “Kalau lai indak untuak dikomersialkan, den raso indak masalah doh. Banyak juo wak danga palawak-palawak mampalesetkan nyanyi di televisi nampaknyo. Kalau nyanyi kebangsaan atau nyanyi nasional awak palesetkan iyo salah mah,” baitu tanggapan Uncu. “Tu apo lo mukasuik Uncu maubah lagua tu?” Tanyo Mak Pono nio tau. “Ha...ha...., alun mambaco koran Mamak sajak kapatang lai?” Uncu baliak batanyo. “Alun! Bilo den ka bisa mambaco koran dek Uncu. Kan sajak Jumaek patang-patang wak den pulang kampuang mah. Uncu tau, kalau kampuang den tu jauah tasuruak di baliak bukik. Indak ado koran di situ doh,” baitu panjalasan Mak Pono. “Oh iyo, lupo den. Mamak masih tingga di daerah terisolir yo? Iko ha, bacolah koran Sabtu dulu!” Kato Uncu sambia maagiahan koran tabik Sabtu ka kawan areknyo tu. Indak mananti lamo, Mak Pono lansuang se maambiak koran dari tangan Uncu. Sarupo kabiasaannyo juo, dibaconyo judul ciek-ciek di halaman muko. Tibo di ciek barita, agak tatagun Mak Pono nampaknyo. Barita nan bajudul ‘Disogok, Bupati Bahar Lapor ke Polisi’ lansuang se dibaconyo sampai ka halaman sambuangan. “Wah, iko yo hebat mah!” Hanyo itu nan talompek dari muncuang Mak Pono. “Aponyo nan hebat Mak?” Giliran Angah Piyan mananggapinyo. “Sakali ko tajadi di nagari ko, surang kapalo daerah diagiah pitih dek pangusaha, tapi ditulak dan malah dilaporkan lo ka polisi lai. Kok dapek bantuak iko se kapalo daerah awak andaknyo, baru barasiah nagari ko dari sogok-manyogok, korupsi dan kolusi. Kan iyo bantuak itu ndak Tan?” Kecek Mak Pono sakalian mintak pandapek ka konco palangkinnyo. “Batua Mak. Sosok kapalo daerah bantuak iko nan paralu dek nagari ko kini,” hanyo itu tanggapan Tan Baro. “Tapi jan ado pulo kapalo daerah atau pajabaik nan manulak dek gara-gara panyogoknyo ketek!” Mamotong pulo Kari Garejoh. “Kalau itu modenyo angguak anggak, geleang iyo mah. Manulak nan ketek supayo diagiah nan gadang, namonyo cadiak buruak,” kato Tan Baro. “Mudah-mudahan sikap Pak Bupati nan ciek ko manjadi contoh tauladan dek kapalo daerah lain. Ijan amuah takijau dek pitih atau dek sogok. Kapentiangan daerah atau kapentiangan rakyaik labiah paralu,” kato Mak Pono. “Nan paralu bana, ijan ado sandiwara di antara kita,” potong Kari baliak. “Mukasuiknyo?” Tanyo Udin Kuriak nan dari tadi anok se. “Mukasuiknyo, jan sampai manulak nan ketek untuak mandapek nan gadang. Kan ado pulo kurenah awak ko nan bantuak itu dek Udin. Katiko urang banyak lah baitu yakin baraso kapalo daerah tu barasiah, sudah itu inyo main rapun se lai,” diulangi juo pandapek partamo tadi dek Kari. “Samo-samo badoa awak supayo saluruh kapalo daerah sarato pajabaik-pajabaik pentiang di nagari ko indak ijau mato mancaliak pitih sogok. Mudah-mudahan nagari awak ko capek barubah dan labiah rancak dari nan sudah-sudah,” baleh Udin. Baitulah ota di lapau Uwo Pulin pagi sampai siang kapatang. Apo nan dipabuek dek Bupati Pasaman Barat itu mandapek dukuangan dari Tan Baro jo kawan-kawannyo. Walau dalam maota, ado-ado se pangananyo, tapi kasudahannyo kasaluruhannyo mamuji Pak Bupati nan manulak sogok. (eSPe St.Soeleman)