Indak Ado nan Pas

Tabukti kini baraso rato-rato indak ado muatan oto prah nan pas sasuai aturan di nagari ko. Jadi, wajar-wajar se jalan-jalan nan biaso ditampuah oto-oto gadang tu capek rusak. Dipaelok-an hari ko, duo pakan sudah tu lah mulai lo rusak. Lah abih se pitih dek tumbok ka tumbok. Pamikiran bantuak itu timbua dari Mak Pono sasudah mambaco barita di koran ‘Singgalang’ nan bajudul ‘Seribuan Truk Ditilang’. Itu baru ciek barita. Di halaman lain juo ado barita sarato foto nan mangatoan truk ditilang dek ulah muatan balabiah. Mak Pono tau bana, baraso oto-oto prah tu memang bamuatan balabiah. Karano inyo acok pulang kampuang dan pasti mancaliak baa mode muatan oto prah maangkuik batubaro. “Salamo ko den mampakirokan muatan oto baro tu labiah tigo puluah ton. Sabarek itu muatannyo, dima pulo ka tatahan dek aspal. Jadi, wajar se jalan ka kampuang den tu capek abihnyo. Ditumbok hari ko, sapakan lai lah balubang lo liak,” baitu kato Mak Pono. “Kini oto-oto prah tu kan lah ditilang Mak!” Sorak Tan Baro. “Iyo alah, tapi kan pangusaha oto prah tu malawan nampaknyo,” baleh Mak Pono. “Malawan baa pulo?” Tanyo Udin Kuriak. “Kan iyo dek Udin tu. Pangusaha oto prah nan mambao batubara tu indak satuju jo aturan muatan nan lah dibuek pamarentah doh. Inyo mintak juo muatan otonyo labiah dari duo puluah ton,” jawek Mak Pono. “Pamarentah harus tegas. Aturan ijan bantuak katiak ula dan ijan pulo bantuak kajai katapel, amuah diragang-ragang,” masuak pulo Uncu Labai. “Kalau basitagang, supir dan urang punyo truk pasti mogok,” kecek Tacin Barain. “Bia se lah nak mogoknyo. Inyo juo nan ka rugi nyo. Kalau otonyo ndak nambang kan ilang pandapatan. Awak samo tau, truk-truk nan bagurila di jalanan daerah awak ko rato-rato masih bautang. Nah, dampak inyo indak manambang tantu ansuran karidik otonyo indak pulo jalan. Kalau lamo-lamo indak dibayia, bisa babaliak oto ka dealernyo,” baleh Tan Baro. “Rancak juo mah ide Tan Baro tu,” kato Mak Pono. “Tapi kalau truk nan mambao sembako mogok iyo gadang dampaknyo ka masyarakaik,” sambuang Tan Baro. “Kapatang tu den pulang kampuang sabana sero Tan. Buliah dietong jo jari se batamu oto prah nyo. Biasonyo, tiok bengkolan batamu oto baro bajalan bairiang-iriang. Kamari susah awak dibueknyo. Di balakang ndak baiak, di muko indak elok,” kecek Mak Pono baliak. Baa kok baitu Mak?” Giliran Kari Garejoh batanyo. “Mancaliak muatannyo tu ha. Kan awak samo tau se, manurun Sitinjau Lawik tu macet dek ulah oto-oto tu. Saandainyo awak di balakang, indak bisa mamotong lantaran panjang liriknyo. Tapi kok di muko inyo, raso ka dirambah se awak ka muko. Karano memang muatannyo sabana barek. Bantuak tekong kacang goreang nampaknyo. Bajojoh,” baitu panjalasan Mak Pono. (eSPe St.Soeleman)