Palanta lapau-Palajaran baru

“Kabanyo kini ado mato palajaran baru di rumah sikola, Ngah. Apo iyo? Kalau memang ado palajaran baru tantu batambah lo pangaluaran awak ciek lai untuak mam bali buku paketnyo.” Baitu kato Kari Garejoh nan ditujukan ka Angah Piyan. Walau mulonyo ka Angah, tapi lah salapaunyo urang mandanga apo nan ditanyoan Kari. “Indak tau den doh. Palajaran apo Ri?” Nampak sarius Angah manjaweknyo. “Budaya Alam Minangkabau ndak Ri? Kalau itu lah lamo mah,” Tan Baro sato pulo manjawek. “Indak itu doh,” baleh Kari. “Oh, mungkin masalah mitigasi bencana mah. Kan sajak nagari ko acok dioyak gampo, banyak pandapek supayo ado palajaran mitigasi bencana. Kalau saandainyo tibo musibah, baa caro-caro manyalamaikkan diri. Salamo ko kan hanyo simulasi ka simulasi se. Jadi, kalau masuak ka palajaran di sikola kan bisa tasimpan di utak anak-anak didi,” kato Angah. “Indak itu doh Ngah,” kato Kari baliak. “Kalau indak itu, apo? Rasonyo cuma itu,” baleh Angah mulai bakaruik kaniang. “Palajaran baru tu banamo tawuran,” kato Kari jo galak manih. “Kalera Kari mah, nyo karajoan awak. Kecek den tadi iyo sabana palajaran baru, sahinggo lah sarius lo den manjalehan,” capek-capek Angah manyadari. “Baa kok coitu kecek Kari?” Kini giliran Mak Pono nan batanyo. “Baru tigo hari mulai sikola, lah bacakak banyak anak sikola. Padohal, wakatu pambukaan mos, pak wali mangatoan, daerah ko bebas tawuran. Indak buliah ado lai cakak banyak atau tawuran di siko doh. Barangkali alun batawik muncuang Pak Wali tu lai, lah bakuampeh anak-anak sikola di siko,” kecek Kari manjalehan. “Kalau bantuak itu kajadiannyo parantian se anak-anak nan sato cakak banyak tu. Kalau paralu jo kapalo sikolanyo sakalian diparantian,” kato Tan Baro. “Manga pulo diparantian. Kalau den bapandapek, disalurkan bana bakat anak-anak tu. Bak kecek Kari tadi, dimasuak an bana ka kurikulum, agiah duo jam palajaran. Anak-anak nan hobi bacakak tu dikumpuan salokal. Pagi-pagi disuruah bacakak lu di laman rumah sikola dan ditonton rami-rami. Tiok samester diadokan tandiang cakak. Urang lua nan nio manonton harus mambayia, kan masuak juo pitih untuak kas rumah sikola tu. Dibuek an bana tampeknyo sarupo ring tinju, baa gak ati?” Kato Udin Kuriak nan dari tadi nampak tapana-pana se mandanga ota konco-konconyo. “Jo caro bantuak itu pasti batamu anak-anak nan babakat dan mudah-mudahan nagari ko bisa mahasilkan patinju kelas dunia, ndak Din,” kato Kari baliak. “Nan ka indak-indak je pangana sughang-sughang nampak di den,” solang Ajo Tondeh. “Daripado nyo bacakak tiok sabanta, nan taniayo urang lain, rancaklah disalurkan bana bakatnyo,” kecek Udin baliak. (eSPe St.Soeleman)