Jadian Palajaran-Swah Lunto

Urang-urang di daerah Sawahlunto panik untuak mambali minyak bensin atau solar. Karano pom bensin atau es-pe-be-u tampek maisi minyak nan ado di Muaro Kalaban ditutuik dek Pertamina. Salamo ko, urang-urang nan punyo kandaraan di Sawahlunto mambali minyak ka pom bensin Muaro Kalaban tu. Bahkan oto-oto dinas di daerah Sawahlunto juo maisi minyak di pom bensin tu. Kini, samanjak pom bensin tu ditutuik, lah ilang aka urang mancari minyak. Jalan satu-satunyo mambali minyak di kios nan haragonyo jauah labiah maha. Kalau indak amuah mambali di kios, harus cari ka pom bensin nan ado di daerah Sijunjuang atau di daerah Solok. “Ibo lo awak jo urang-urang di Sawahlunto tu nyo Ngah,” kato Mak Pono ka Angah Piyan nan samo duduak maota mananti wakatu babuko di lapau Uwo Pulin, kapatang. “Baa tu?” Tanyo Angah. “Bacolah iko ha, pom bensin nan cuma satu-satunyo di daerah itu, kini ditutuik dek Pertamina. Bayangkanlah, kama kiro-kiro urang situ mancari bensin. Iko sabanta lai rayo ka tibo pulo ha, lah jaleh banyak urang rantau nan paralu bensin,” kecek Mak Pono manjalehan. “Baa kok sampai ditutuik Mak?” Tanyo Udin Kuriak dari jauah. “Wak den sabananyo ndak lo tau doh, tapi dari koran ‘Singgalang’ ko tadi den baco, kabanyo dek ulah manjua minyak jarigen,” hanyo itu jawek Mak Pono. “Kalau itu panyababnyo iyo salah mah. Karano sajak dulu kalau den ndak salah, es-pe-be-u dilarang manjua minyak ka urang-urang nan mambao jarigen. Karano malayani jarigen dalam jumlah banyak akan mambuek konsumen lain tagaduah,” Udin Kuriak bakomentar. “Kok indak dilayani nan mambao jarigen, di ma pulo urang manggaleh di kios mandapek-an minyak? Atau urang nan punyo heler, dari ma mandapek solar?” Potong Tacin Barain. “Kalau hanyo malayani untuak limo liter den raso indak masalah bana doh. Nan manjadi masalah tu kan maisi jarigen dalam jumlah banyak,” baleh Mak Pono. “Manuruik pandapek den, iko adolah pangalaman dan harusnyo es-pe-be-u nan lain manjadikannyo palajaran. Kalau memang pom bensin tu tutuik dek ulah malayani urang mambali pakai jarigen dalam jumlah banyak, mako jan pulo dilayani pambali bantuak itu. Ijan sampai tataruang di batu nan samo,” kasudahannyo Angah Piyan sato juo mangaluakan pandapeknyo. “Batua Ngah. Harusnyo iko dijadian palajaran. Karano diakui sampai kini masih banyak es-pe-be-u nan malayani urang mambali pakai jarigen. Ciek lai, sarupo nan pernah awak bahas dulunyo, pihak Pertamina harus mambuek aturan nan indak kaku. Kalau dilarang abih mambali minyak pakai jarigen bisa mati urang manjua minyak di kios. Bisa indak manumbuak padi urang di kampuang Mak Pono gara-gara indak ado solar. Bisa-bisa indak malawik urang-urang di kampuang Uncu Labai. Maklum, urang-urang tu pasti pai mambali minyak mambao jarigen. Kan indak mungkin pulo masin heler dibao ka pom bensin doh, atau parahu diosong ka es-pe-be-u,” Kari Garejoh indak pulo katinggalan. “Ha....ha....., baa pulo modenyo Mak Pono manjujuang masin heler atau Uncu maosong kapa ka es-pe-be-u untuak maisi solar. Ado-ado se pandapek Kari mah,” baleh Angah. Urang-urang nan lain lah sato pulo galak mandanga komentar Kari tu. (eSPe St.Soeleman)