Palanta Lapau-Demi Nazar

Masalah si Nazaruddin masih juo manjadi bahan ota di lapau Uwo Pulin. Itu dek ulah samanjak awal, Nazar memang banyak maundang carito dan patuik dijadikan bahan carito di mano sajo. Mulai dari rumah sampai tampek karajo, di kantua atau di ateh oto, pagi-pagi atau sanjo-sajo. Kalau kapatang-kapatang baa inyo tatangkok di lua nagari, mako kini nan manjadi bahan ota di lapau Uwo Pulin adolah caro si Nazar baliak ka kampuang di Indonesia. Untuak sampai ka Indonesia sajo, Nazar harus dicaterkan kapa tabang ciek. Harago caterannyo indak pulo saketek, yaitu ampek miliar. “Yo santiang si Nazar ko nampak di den!” Kato Udin Kuriak. “Nazar ma juo lai Din? Lah tiok hari Nazar ka Nazar se nan awak otakan mah. Beko salah-salah maota, manjadi gunjiang, bisa berang abaknyo. Kalaulah bagunjiang awak manjalang babuko ko, tantu rusak pulo puaso awak,” baleh Angah Piyan. “Nazar nan jadi topik masalah sajak tigo bulan ko kan ciek nyo Ngah, yaitu anggota dewan nan malapia pitih proyek, sudah tu cigin ka lua nagari. Dari lua nagari inyo mancibia-cibia, mambutuik an tinju bagai ka katuanyo sarato urang-urang hebat lainnyo di nagari ko. Malah kapalo jaksa jo urang ka-pe-ka diagonyo dari jauah,” jawek Udin manjalehan. “Jadi kini apo lo masalahnyo lai Din?” Tanyo Mak Pono. “Ha....., bacolah dek Mamak barita ko. Ampek miliar cater kapatabang untuak mambao si Nazar tu ka Indonesia. Bayangkanlah dek Mamak, kok dibuek an ka musajik bisa salasai duo atau ampek musajik dek nyo mah. Apolai kalau disumbangkan ka anak yatim manjalang rayo ko, bara banyaknyo bisa tabantu tu?” kato Udin. “Nan paliang sulik maetongnyo kalau pitih ampek miliar tu dibalian ka kolak, karupuak nasi atau ka sitara bagai, bara kontainer banyaknyo tu. Barangkali kok diparkir oto prah mambaonyo dari Padang sampai ka Lubuak Aluang liriknyo mah,” Kari Garejoh indak katinggalan pulo mangaluakan pandapek. “Itulah hebatnyo si Nazar. Salain bisa mandapek proyek-proyek khusus atau dapek ujuang-ujuang proyek urang, inyo juo bisa raun-raun ka lua nagari. Walau lah dicabuik paspornyo, masih bisa mamakai paspor urang lain untuak raun. Alun cukuik lai, diupah pulo urang untuak maamankannyo. Lah tatangkok, harus pulo dicarian kapa tabang untuak mambao pulang dan caternyo tu mah ampek miliar. Baa juo lai, daripado ado pulo masalah di jalan kok pakai kapatabang sambuang basambuang atau transit, bialah dicater se. Sadonyo demi Nazar,” Tan Baro lah mangecek pulo. “Dari ma pitihnyo tu? Tanyo Uncu Labai. “Ma tau wak, wak puaso,” jawek Tan Baro sambia galak. “Nan bantuak itu lai bisa pulo untuak si Nunun ndak Tan?” Tanyo Udin. “Nunun nan ma ko Din? Nan manggaleh pabukoan dakek simpang jalan tu?” Semba Kari. “Nunun itu indak paralu dicari doh. Nampak se dari siko tampek manggalehnyo mah,” baleh Udin. Baitulah ota urang-urang di lapau Uwo Pulin sambia mananti wakatu babuko kapatang. (eSPe St.Soeleman)