Walau kabakaran di pasa raya lah tigo hari balalu, tapi ota nan bakaitan jo itu alun abih di lapau Uwo Pulin. Urang-urang di situ maraso, masalah kabakaran indak bisa dianggap main-main doh.
Wakatu ketek, api tu memang bisa manolong. Bisa mambuek nasi masak, bisa dijadikan untuak manggosok pakaian dan bisa pulo untuak mambaka ikan, mambaka ayam, mambuek kue sarato lainnyo. Tapi, kalau apinyo lah gadang, lah mambubuang tinggi, itu adolah lawan dan harus dilawan. Kalau indak dilawan, bisa-bisa data nagari ko dek nyo. Bisa-bisa, sagalo nan dibangun jo titiak paluah masyarakaik ilang dalam babarapo wakatu se.
Itulah sababnyo mako masalah kabakaran masih juo manjadi ota dek komunitas lapau Uwo. Apolai di koran ‘Singgalang’ ado babarapo barita nan bahubuangan jo kabakaran, ciek di antaronyo bajudul ‘Kebakaran Terus Mengancam, Pasar Satelit Tidak Memiliki Hydrant’.
“Tan Baro, hydrant ko apo aratinyo? Tampek parkir ko atau tampek makan-makan?” Baitu tanyo Udin Kuriak ka Tan Baro nan samo-samo duduak mananti wakatu babuko di lapau Uwo Pulin.
“Makanan mah Din!” Sorak Kari Garejoh.
“Hydrat tu tampek maisi aia oto tangki pamadam kabakaran Din. Bantuaknyo agak maarah pompa aia, tapi indak pakai tangkai doh. Kalau tajadi kabakaran, oto-oto pamadam tu tingga mancucuak-an slang se ka pakakeh tu. Jadi, indak harus raun-raun jo kacapatan tinggi untuak mancari aia doh,” baitu panjalasan Tan Baro.
“Tapi salamo ko den caliak oto-oto pamadam tu ilia-mudiak mancari tampek manyasok. Kadang-kadang di banda bakali, kadang-kadang di Tabiang. Pokoknyo dima ado banda nan aianyo lai agak banyak diiruiknyo,” baleh Udin.
“Nah, guno hydrant supayo indak sarupo itu lai. Kalau salamo ko oto pamadam ilia-mudiak, itu dek ulah hydrant indak bafungsi. Lai bana barisi, tapi lokasinyo taambek dek urang manggaleh,” Tan Baro manjalehan.
“Yo lah antah den mancaliak nagari ko lai. Pakakeh untuak pamadam kabakaran se indak takamehi. Lah bantuak itu kabakaran tiok bulan tajadi, palengkapan untuak mamadamkan api indak cukuik. Kabanyo dari sabaleh oto pamadam, hanyo ampek nan elok nyo. Salabiahnyo manjadi palengkap panderita se. Kok ota pajabaiknyo satinggi langik. Sadonyo ka dibuek. Mulai dari manggiriak bukik, malantai lawik, oto massal, tampek hiburan, mambuek iko, mambuek itu, tapi nan wajib indak takarajoan,” Kari Garejoh mangecek baliak.
“Lah mode itu kakobehnyo, tu kamanga wak? Inyo nan mamacik tampuak di siko,” salo Mak Pono.
“Yo jadilah, pakakeh pamadam kabakaran ko indak bisa dianggap sapele doh. Atau memang lah ado niaik untuak maabihan nagari ko? Kalau indak, sugirolah tambah oto pamadam kabakaran, paelok-i tampek pangisian aia atau hydrant nan indak bafungsi. Sudah tu jan dipabiakan juo urang manggaleh sampai manutuik jalan ka hydrant tu. Indak itu se doh, wajibkan toko-toko atau tampek-tampek balanjo jo kantua-kantua mamakai racun api. Jo caro itu, akan bisa dikurangi bahayo kabakaran. Kan iyo baitu ndak Tan?” Kecek Kari baliak sambia mintak pandapek ka konco palangkinnyo.
“Yo, lah. Satuju ambo jo pandapek Kari. Memang itu nan paralu. Adolah andaknyo kapadulian untuak masyarakaik. Ijan hanyo ota se nan malangik, tapi lupo jo kondisi atau kanyataan nan ado di bumi,” hanyo itu tanggapan Tan Baro.
Karano wakatu babuko lah samakin dakek, urang-urang tu pun mulai bubar manuju rumah surang-surang. (eSPe St.Soeleman)
Wakatu ketek, api tu memang bisa manolong. Bisa mambuek nasi masak, bisa dijadikan untuak manggosok pakaian dan bisa pulo untuak mambaka ikan, mambaka ayam, mambuek kue sarato lainnyo. Tapi, kalau apinyo lah gadang, lah mambubuang tinggi, itu adolah lawan dan harus dilawan. Kalau indak dilawan, bisa-bisa data nagari ko dek nyo. Bisa-bisa, sagalo nan dibangun jo titiak paluah masyarakaik ilang dalam babarapo wakatu se.
Itulah sababnyo mako masalah kabakaran masih juo manjadi ota dek komunitas lapau Uwo. Apolai di koran ‘Singgalang’ ado babarapo barita nan bahubuangan jo kabakaran, ciek di antaronyo bajudul ‘Kebakaran Terus Mengancam, Pasar Satelit Tidak Memiliki Hydrant’.
“Tan Baro, hydrant ko apo aratinyo? Tampek parkir ko atau tampek makan-makan?” Baitu tanyo Udin Kuriak ka Tan Baro nan samo-samo duduak mananti wakatu babuko di lapau Uwo Pulin.
“Makanan mah Din!” Sorak Kari Garejoh.
“Hydrat tu tampek maisi aia oto tangki pamadam kabakaran Din. Bantuaknyo agak maarah pompa aia, tapi indak pakai tangkai doh. Kalau tajadi kabakaran, oto-oto pamadam tu tingga mancucuak-an slang se ka pakakeh tu. Jadi, indak harus raun-raun jo kacapatan tinggi untuak mancari aia doh,” baitu panjalasan Tan Baro.
“Tapi salamo ko den caliak oto-oto pamadam tu ilia-mudiak mancari tampek manyasok. Kadang-kadang di banda bakali, kadang-kadang di Tabiang. Pokoknyo dima ado banda nan aianyo lai agak banyak diiruiknyo,” baleh Udin.
“Nah, guno hydrant supayo indak sarupo itu lai. Kalau salamo ko oto pamadam ilia-mudiak, itu dek ulah hydrant indak bafungsi. Lai bana barisi, tapi lokasinyo taambek dek urang manggaleh,” Tan Baro manjalehan.
“Yo lah antah den mancaliak nagari ko lai. Pakakeh untuak pamadam kabakaran se indak takamehi. Lah bantuak itu kabakaran tiok bulan tajadi, palengkapan untuak mamadamkan api indak cukuik. Kabanyo dari sabaleh oto pamadam, hanyo ampek nan elok nyo. Salabiahnyo manjadi palengkap panderita se. Kok ota pajabaiknyo satinggi langik. Sadonyo ka dibuek. Mulai dari manggiriak bukik, malantai lawik, oto massal, tampek hiburan, mambuek iko, mambuek itu, tapi nan wajib indak takarajoan,” Kari Garejoh mangecek baliak.
“Lah mode itu kakobehnyo, tu kamanga wak? Inyo nan mamacik tampuak di siko,” salo Mak Pono.
“Yo jadilah, pakakeh pamadam kabakaran ko indak bisa dianggap sapele doh. Atau memang lah ado niaik untuak maabihan nagari ko? Kalau indak, sugirolah tambah oto pamadam kabakaran, paelok-i tampek pangisian aia atau hydrant nan indak bafungsi. Sudah tu jan dipabiakan juo urang manggaleh sampai manutuik jalan ka hydrant tu. Indak itu se doh, wajibkan toko-toko atau tampek-tampek balanjo jo kantua-kantua mamakai racun api. Jo caro itu, akan bisa dikurangi bahayo kabakaran. Kan iyo baitu ndak Tan?” Kecek Kari baliak sambia mintak pandapek ka konco palangkinnyo.
“Yo, lah. Satuju ambo jo pandapek Kari. Memang itu nan paralu. Adolah andaknyo kapadulian untuak masyarakaik. Ijan hanyo ota se nan malangik, tapi lupo jo kondisi atau kanyataan nan ado di bumi,” hanyo itu tanggapan Tan Baro.
Karano wakatu babuko lah samakin dakek, urang-urang tu pun mulai bubar manuju rumah surang-surang. (eSPe St.Soeleman)
Postingan
Tidak ada komentar:
Posting Komentar