PalantaLapau-Awas kanai Tembak

‘Amankan Lebaran 2011, Polda Sumbar Siapkan Penembak Jitu’. Baitu judul barita di koran ‘Sing galang’ nan dibaco dek Angah Piyan. Tantu sajo barita tu manarik, karano panembak jitu jarang kalua, kalau indak talalu pentiang. Nah, kini di hari rayo, Polda manyiapkan panembak jitu, pastilah supayo urang balebaran bisa aman, indak ado gangguan. Karano bisa sajo, urang-urang baniek buruak atau urang-urang jaek baoperasi di maso-maso lebaran. Maklum, di maso lebaran banyak rumah urang batinggaan dalam kondisi takunci. Salain itu banyak pulo nan pulang kampuang mambao ameh pariasan atau pitih dan harato. Bisa sajo, itu diintai dek urang jaek jo parampok. Itulah makonyo Angah manjadikannyo bahan ota di lapau Uwo Pulin sambia mananti wakatu babuko, kapatang. “Mudah-mudahan se lebaran tahun ko di siko aman. Indak ado paluru nan kalua dari badia jo pistol aparat kaamanan, yo Tan!” Baitu kato Angah ka konco palangkinnyo. “Iyo. Harapan awak dan urang-urang banyak tu tantu samo. Tapi, baa kok itu nan takana dek Angah?” Tanyo Tan Baro. “Tadi den baco di koran ko, Polda manyiapkan panembak jitu di maso lebaran,” jawek Angah. “Panembak jitu tu disiapkan indak untuak awak doh Ngah, tapi untuak parampok, atau untuak urang-urang nan babuek kriminal,” kato Tan Baro. “Kalau Angah nio bagian lo, cubolah marampok di Pantai Padang atau di Pantai Aia Manih tu ha. Basarang paluru di kapalo Angah buliah mah,” tibo-tibo Kari Garejoh mamotong ota urang baduo tu. “Tapi bisa juo awak-awak nan indak salah ko kanai tembak mah Tan. Istilahnyo paluru nyasar. Kan banyak kajadian paluru nyasar sajak dulu mah. Jadi paralu juo awak waspada dan hati-hati,” kecek Mak Pono pulo. “Waspada dan hati-hati tu memang paralu. Indak bana ado panembak jitu, kahati-hatian paralu dijago. Apolai kalau mambao kandaraan bamotor. Indak hati-hati tantu cilako. Labiah dari itu, awak harus waspada supayo indak manjadi sasaran urang-urang jaek. Karano itu, ijan mamakai pariasan mancolok, ijan mambao barang-barang nan diintai parampok, ijan mambao pitih dalam jumlah banyak. Kok maninggaan rumah, tinggaanlah dalam kondisi takunci dan aman. Agiah tau urang di sabalah rumah awak, kalau awak pulang kampuang,” panjang leba juo Tan Baro mananggapi kato-kato Mak Pono. “Satuju!” Tadanga pulo suaro Ajo Tondeh. “Apo nan satuju?” Tanyo Kari “Iyo satuju jo pandapek Tan Baro,” hanyo itu jawaban Ajo. (eSPe St.Soeleman)