Basalingkik Pingkik

Lapau Uwo Pulin lah mulai bukak sajak duo hari ko. Hanyo sajo, palanggan setianyo masih alun saluruhnyo nan datang. Kamungkinan masih balebaran di kampuang atau di tampek-tampek familinyo. Salain itu, kamungkinan ado juo nan pai raun-raun jo kaluarga atau dunsanak-dunsanak nan datang dari rantau. Maklum, tahun ko banyak urang rantau nan pulang kampuang. Kabanyo babarapo hari manjalang lebaran sakapa urang rantau marapek di Taluak Bayua. Kapatang pagi, nan lai nampak duduak di palanta lapau Uwo hanyolah Udin Kuriak, Tacin Barain, Angah Piyan sarato Mak Pono. Walau saketek, tapi ota jo garah lai balapia-lapia juo. “Kapatang den nampak Ajo Tondeh. Lah kama lo inyo kini?” Baitu tanyo Mak Pono. “Inyo manggaleh sate di pantai Piaman. Kan di situ urang rami,” Udin Kuriak mananggapi kalimat Mak Pono. “Rayo kini agak beda taraso di den Mak,” kato Udin Kuriak pulo. “Babeda baa lo? Den raso dulu-dulu bantuak iko juo nyo,” baleh Mak Pono. “Iyo, salain babeda jadwal sumbayang rayo, babeda jumlah puasonyo, juo taraso kurang meriah,” kato Udin. “Ha....itu hanyo parasaan Udin se. Nan pasti jalan-jalan di nagari ko labiah banyak macetnyo dibandiang tahun lapeh. Kalau dulu hanyo Padang Panjang dan Bukik Tinggi se nan macet, tapi kini jalan antaro Bukik Tinggi ka Payokumbuah juo sato lo macet. Malah, kabanyo jalan ka kampuang Uncu macet juo,” Uwo Pulin sato mangecek.“Iyo mah Wo. Sabana basalingkik pingkik di Bukik Tinggi. Mulai se dari Padang Panjang sampai ka Bukik Tinggi bainsuik-insuik jalannyo. Barangkali tukang uruik bisa panen deknyo,” kecek Tacin. “Apo lo hubuangan macet, basalingkik jo tukang uruik Cin?” Tanyo Angah. “Dek ulah macet, supir tantu basitumpu manakan kopleang jo rem. Dek ulah lamo bantuak itu bisa sakik batih mah. Ubeknyo tantu bauruik,” jawek Kari. “Ha...ha....., iyo lo mah yo. Tapi takana di den baa kok bantuak itu bana rami kandaraan? Saolah-olah pindah macet di Jawa tu ka siko,” potong Uwo. “Urang rantau banyak nan pulang. Salain pakai kapa tabang jo kapa lawik, banyak lo nan mambao oto surang-surang. Saandainyo ado se agak saribu atau duo ribu nan mambao oto pulang, dan rato-rato tujuan raunnyo cuma ka Bukik Tinggi, tantu iyo basalingkik pingkik jadinyo. Alun lai urang-urang nan mamakai kandaraan roda duo,” Mak Pono manjalehan. “Ndeh, den kok jo motor tu iyo sabana ampun. Bantuak samuik di jambu,” kato Tacin pulo. “Itu tandonyo ekonomi di nagari awak samakin maju. Jadi kalau ado juo nan mangatoan nagari awak ko bansaik, itu indak saluruhnyo batua. Barangkali kini dirato-ratoan tiok rumah lah punyo motor dan itu juo manjadi panyabab kamacetan,” kato Mak Pono. “Iyo mah. Urang awak ko pai marantau beda jo urang Jawa. Kalau urang Jawa pulang kampuang atau istilah di situ mudiak di hari rayo manjadi kaharusan, sahinggo baa pun kondisinyo, nan pentiang pulang. Urang awak, kalau indak banyak pitih ndak pulang. Malah, ado lo nagari, kalau indak bao oto pulang, gadang sagan jo malunyo. Jadi masuak aka juo jalan-jalan di nagari ko basalingkik pingkik dek kandaraan,” kecek Angah. (eSPe St.Soeleman)