Dilapehan-Palanta

Ota di lapau Uwo Pulin masih juo soal padusi nan manari talanjang bulek. Walau kajadiannyo lah duo hari nan lapeh, tapi komunitas lapau tu maraso paralu manjadikannyo untuak bahan ota. Baa ka indak? Salamo iduang ditampuah angok baru kini ado urang padusi manari-nari indak bapakaian di muko laki-laki banyak. Dulu di Minangkabau ko, ijankan mambukak pakaian di nan rami, tasingkok saketek se lah lua biaso malunyo. Kalau kapatang nan dipaotakan adolah masalah tatangkoknyo, mako kini nan dibahas adolah masalah dilapehannyo kaduo padusi tu. Saluruh manusia nan ado di lapau Uwo takajuik mambaco barita di koran ‘Singgalang’ nan mangatokan kaduo panari talanjang tu dilapehan. Pandapek urang-urang tu, mustinyo kaduo padusi tu dihukum. Saindak-indaknyo diproses sampai ka pangadilan. Karano ado undang-undang nan dilangganyo. “Heran den, baa lo mako dilapehan paja-paja nan manari talanjang kapatang tu?” Baitu kato Mak Pono ka kawan-kawannyo. “Samo wak mah Mak. Maso iyo bantuak itu karajonyo bisa dilapehan baitu se. Jan-jan lah manarimo pulo oknum dalam kasus ko ndak? Atau ado urang bagak nan mambeking?” Angah Piyan mananggapi pandapek Mak Pono. “Harusnyo kasus ko ditaruihan ka polisi. Bak kecek barita koran ko juo, ado undang-undang nan lah dilangganyo. Salain kaduo padusi dalang tu juo paralu diproses urang punyo kafe. Karano inyo nan manyadiokan hiburan bantuak itu,” kecek Tan Baro.“Jadi baa? Lah lapeh kijang ka rimbo Tan?” Udin Kuriak nan baru tibo di lapau tu lansuang se batanyo. “Iyo. Kaduonyo lah dilapehan,” jawek Tan Baro. “Oh....., lah gadang galaknyo mah. Kini antah lah di Singapur gai nyo. Atau manyalurkan bakat di Thailand. Kecek urang, hanyo di Thailand nan ado tari-tarian talanjang,” kato Udin baliak. “Kabanyo iyo, tapi indak ado nan polos co itu doh,” baleh Mak Pono. “Ndeh Mak Pono bantuak lah pernah ka Thailand se mah,” semba Kari Garejoh. “Itu kecek urang pulo,” jawek Mak Pono. “Kini bantuak iko se lah. Karano iko kajadian partamo dan sabana mambuek malu ranah Minang, sarancaknyo diproses dek polisi. Walaupun kaduonyo lah dilapehan, polisi harus mangaja dan manangkoknyo. Baitu juo manangkok nan punyo kafe. Jan cukuik jo segel atau jo ditutuik se. Baa dek Angah?” Kato Tan Baro sakalian mintak pandapek ka Angah Piyan. “Satuju! Supayo iko batua-batua manjadi palajaran dek kafe-kafe lain. Jan pernah manyadiokan urang manari indak bapakaian di nagari ko. Ingek, iko Minangkabau. Nagari nan baradaik jo baagamo. Ijan iduik sarupo kambiang, atau bantuak kuciang. Kan iyo baitu ndak Ncu?” Jawek Angah mintak pandapek pulo ka Uncu Labai. Maklum, Uncu adolah manusia nan paliang tasingguang wakatu kajadian tu ado. “Kok ka berang den, baa. Indak ka berang baa pulo. Maso iyo bantuak itu kajadiannyo, dilapehan baitu sajo?” Hanyo itu nan bisa dikatoan Uncu sambia manggawik kapalonyo nan indak gata. (eSPe St.Soeleman)