Pareman Bak Jangguik-Palanta

Wakia Walikota Padang mamintak ka Dinas Parubuangan jo polisi untuak mambarantas pareman-pareman di sapanjang jalur angkutan kota. Apak tu manilai, pareman-pareman di sapanjang jalur angkot lah maingkek-ingkek parangainyo dan masyarakaik maraso takuik. Nampaknyo apak tu baru tau kalau pareman-pareman nan ado di simpang-simpang jalan atau tampek-tampek tatantu di kota ko marasahkan warga. Mungkin se apak tu tau sasudah adonyo pareman nan maningga dikaroyok urang pakan lampau. Ikolah barita koran ‘Singgalang’ nan manjadi bahan ota di lapau Uwo Pulin pagi kapatang. Walau barita tu ado di koran hari Sabtu, tapi baritanyo patuik dijadikan sumber ota. Maklum, urang-urang di lapau Uwo lah sajak lamo tau adonyo pareman di tampek-tampek tatantu atau di simpang lampu merah. Bamacam caro pareman tu mamintak pitih. Mulai dari caro bapura-pura sampai main kasa se. “Ha...ha.....talambek tau apak ko nampaknyo mah!” Kato Kari Garejoh. “Apak ma?” Tanyo Udin Kuriak. “Apak wakia walikota ko ha, talambek tau kalau di kota ko banyak pareman nan mamalak supir angkutan kota sampai mamalak siapo sajo nan dirasonyo bisa dimakan. “Oh itu. Kalau soal pareman mamalak memang banyak. Ado nan pura-pura mangamen, ado nan icak-icak mamintak retribusi, ado nan manjadi tukang semprot parfum dan malah ado pulo nan main kasa se mamintak. Kalau supir angkot ndak amuah maagiah, lansuang didaram. Minimal dapek caruik,” apo nan dikatokan Kari lansuang mandapek tanggapan dari Udin. “Indak di jalur angkot se doh Ri. Di tampek-tampek wisata atau tampek karamaian juo banyak pareman nan mamalak. Di objek wisata tu sasarannyo anak mudo nan bapasang-pasangan. Ado nan bapura-pura manjadi pangamen atau mampaseyoan lapiak. Kalau indak amuah maagiah pitih atau indak pulo manyeyo lapiak, bisa menjadi pakaro. Di tampek-tampek karamaian nan jadi sasarannyo urang pakai kandaraan. Inyo icak-icak manjadi tukang parkir. Biasonyo biaya parkir saribu, bisa se manjadi tigo ribu atau ado nan sampai sapuluah ribu bagai. Contohnyo saat wisuda atau acara hiburan,” Angah Piyan lah sato pulo mangaluakan pandapeknyo. “Itulah nan ka diabihan dek pamarentah kota. Pak wakia walikota mintak ka Dinas Parubuangan bakarajosamo jo polisi untuak maabihan pareman tu. Manuruik den indak ka bisa doh!” Kato Kari baliak. “Baa tu Ri?” Tanyo Mak Pono. “Karano pareman tu samo jo jangguik. Dicukua kini, bisuak nyo lah tumbuah lo baliak mah. Baa manuruik tan Baro?” Jawek Kari sambia mintak pandapek konco palangkinnyo. “Ha....ha.....dapek se istilahnyo dek Kari yo. Batua tu mah. Pareman tu bak jangguik. Dirazia kini, bisuak nyo ado lo liak di tampek tu. Antah kok lai ka bisa dek patugas maunian duo puluah ampek jam di tampeknyo baoperasi tu,” hanyo itu tanggapan Tan Baro. “Manga warga biaso, pajabaik banyak juo nan manjadi pareman.” Tadanga suaro Ajo Tondeh. (eSPe St.Soeleman)