Tando Dunia lah Tuo-Palanta

“Ilia banda mudiak banda batungkek jo rantiang palo Indak didanga kini lah didanga tandonyo dunia iyo lah tuo. Nak duo pantun sairiang: Urang Gantiang pai ka Muaro andak mambali goreang jo katan Karano dunia memang lah tuo pabanyak ibadah sarato amalan.” Uncu Labai lah bapantun pulo baliak, sambia duduak minum kopi di lapau Uwo Pulin. Kawan-kawannyo hanyo mandanga sampai salasai. Karano, jarang-jarang Uncu bapantun bantuak itu. “Batua mah Ncu. Nampaknyo duya ko memang lah tuo. Lah banyak tando-tando kiamaik ka tibo. Kapatang ado pakakeh langik nan jatuah ka bumi,” Ajo Tondeh mangomentari isi pantun konco palangkinnyo. “Yo, itulah nan den mukasuik. Apo-apo nan indak pernah tajadi sajak dulu, kini lah nampak nyato di muko iduang awak. Hari ko koran ‘Singgalang’ manurunkan barita kajadian-kajadian aneh. Ado anak nan indak cukuik wajahnyo dan ado pulo nan punyo kalamin ganda. Iko kan indak pernah ado sajak dulu doh,” kecek Uncu. “Batua Ncu. Tadi den baco lah limo urang bayia di rumah sakik Jati nan lahia cacat dan aneh. Baa kok bisa sarupo itu yo?” Salo Udin Kuriak. “Tuhan itu babuek sakahandakNyo Din. Karano itu, marilah awak pabanyak ibadah jo amalan. Hanyo itu nan ka manyalamaik-an awak nanti di Padang Mahsyar. Harato balimpah, rumah bantuak istana, pitih bakardus-kardus itu indak ka manolong awak isuak doh. Sakayo-kayo manusia di dunia ko, mati hanyo mambao kain putiah indak bajaik juo nyo,” kecek Uncu maagiah nasehat ka kawan-kawannyo nan samo duduak minum kopi di lapau tu. “Lai tadanga tu Ri? Ijan salamak paruik se iduik ko. Harato urang jan manjadi harato awak. Pabanyaklah ibadah lai. Kok ado utang, bayia lai,” Uwo Pulin indak pulo katinggalan. “Ha...ha...., masuak galeh Uwo,” semba Angah Piyan. “Saluruh urang di lapau ko punyo utang di Uwo, tapi baa kok den surang se nan nampak?” Tanyo Kari. “Dek Kari indak pernah maansua,” kecek Angah. “Eh, lai ado debet jo kridit di pambukuan Uwo? Caliak-caliak banalah dulu. Tiok pakan den pasti maansua utang. Cuma kan samo se jo Angah, utang dibayia, lansai indak. Ha....ha....,” baleh Kari sambia galak. “Kok tibo kiamaik, samo-samo bautanglah awak garan,” mangecek pulo Mak Pono. “Kuncinyo kan lai samo-samo punyo niaik untuak mambayia? Itu nan pentiang,” kato Uncu. Baitulah ota di lapau Uwo Pulin. Masih sarupo hari-hari biasonyo, ota pasti bamulo dari barita-barita nan ado di koran ‘Singgalang’. Hanyo itulah surek kaba nan dipicayo dek urang-urang di lapau tu. (eSPe St.Soeleman)