Bacakak Abak jo Amak_Palanta

“Nak urang Koto Barapak mambao balam tigo gayo Bacakak abak jo amak dek ulah gulai pisang mudo” Samo takajuik urang-urang nan ado di lapau Uwo Pulin mandanga pantun dari Mak Pono. Indak ado nan manyangko salamo ko, ruponyo Mak Pono lai santiang juo bapantun. “Lai mah Mak!” Angah Piyan nan partamo bakomentar. “Lai lah, baa lo ka indak dek Angah. Dulu samaso mudo-mudo matah den sato pulo masuak grup kasenian di kampuang. Ado saluang jo rabab, randai jo silek bagai. Kalau langkah randai jo silek indak takana di den lai doh. Nyampang diagonyo bacakak dek urang kini ko mungkin tarompa den ambiak dulu, sudah tu pakai langkah saribu. Tapi, kalau pantun lai masih ado juo takana ciek-ciek,” baitu Mak Pono manjalehan ka Angah sarato konco-konconyo nan lain di palanta lapau tu. “Kalau wak den pantun tu dalam surek cinto, Mak!” Potong Kudun. “Samo wak mah. Den mangirim surekdulunyo iyo pakai pantun juo. Kalau ndak salah pambukaan surek tu babunyi: “Bandung dulu baru Jakarta. Cium dulu baru dibaca”. Ha....ha.....,” baleh Mak Pono. “Berarti awak lah sato malestarikan budaya Indonesia sajak ketek mah. Kini, mano pulo ado nan bantuak itu,” kecek Angah. “Takana di den, baa kok tibo-tibo se Mamak bapantun bantuak tadi tu? Apo karano indak ado Uncu nan bagala rajo pantun?” Tanyo Udin Kuriak. “Tadi den baco di koran ‘Singgalang’ ko barita nan bajudul ‘Dewan Kecewa Sikap Gubernur. Wagub Ditinggal Tanpa Mandat’. Dalam barita tu, Wagub indak bisa manandotangani dokumen pentiang, tamasuak kaputusan anggaran kalau den ndak salah. Panyababnyo, indak ado surek kuasa atau mandat dari gubenur nan kini sadang di Makah. Nah, sadang mambaco itu, takana se di den pantun bantuak tadi,” jawek Mak Pono manjalehan. “Jadi, apak tu pai ka Makah jo jabatan-jabatannyo? Satau den, nan pai tu urangnyo. Sadangkan jabatannyo tatap tingga,” manyorong pulo Kari Garejoh. “Ado pulo anggota dewan maistilahkan, duo matoari di kantua gubenur,” tadanga suaro Tan Baro. “Itu apo pulo mukasuiknyo Tan?” Tanyo Kudun. “Yo samo-samo batandiang santiang, samo-samo batandiang hebat. Nan nomor duo nio lo sarupo nomor satu, dima pulo ka bisa. Nan nomor satu baitu pulo,” jawek Tan Baro. “Oh, ngarati den kini. Patuiklah acok nampak di den, dima ado gubenur, nan wakianyo di situ pulo. Mustinyo kan pai ciek, tingga ciek. Itu baru kompak namonyo,” kato Angah. “Jadi, baadu pungguang abak jo amak tu kini Tan?” Tanyo Kari. “Ambo ndak lo bisa mangatoan sarupo itu doh. Cuma nan jaleh, ibarat di dalam ruma tanggo, parang dingin antaro abak jo amak kini lah dikatahui dek anak-anak, tungganai sarato urang subalah manyubalah. Barangkali batua juo pantun Mak Pono tadi mah, lah bacakak abak jo amak, panyababnyo antah apo-apo,” kecek Tan Baro. “Baraja dari pangalaman, alam takambang jadi guru Tan. Mesra urang hanyo wakatu bapole atau bapacaran kecek anak-anak kini. Katiko pacaran tu iyo sabana mesra. Taguliciak se saketek paguiknyo lua biaso. Tapi lah nikah, jalannyo badaulu bakudian. Lah tatilantang bininyo di balakang, kanai bulancik juo lai. Itulah kau, mato mambarek kaniang se. Itu nan bakatoan ka bini. Baitu juo pasangan kapalo daerah. Mesra pasangan tu hanyo sabanta, malakik dapek raso. Kan lah samo wak caliak, alun ado pasangan kapalo daerah nan maju baliak jo pasangannyo. Malah, labiah banyak nan manyatokan mundur di tangah pajalanan. Iko realita!” Mak Pono mangecek langkok jo contoh parumpamaannyo. (eSPe St.Soeleman)