Karajo Maleh, Makan Saupiah

Nampaknyo urang-urang di lapau Uwo Pulin sabana indak abih-abihnyo mampaotakan pagawai. Baru kapatang masalah gaji nan naiak tiok taun, kini ado lo masalah lain. Ota bamulo dari barita di koran ‘Singgalang’ nan bajudul ‘Wabup Sidak, Pegawai Bergegas Isi Absen’. Kajadiannyo di kampuang Pak Osu. Kabatulan pulo, Pak Osu juo sadang ado di dalam lapau. “Baa caritonyo ko Su?” Tibo-tibo Udin Kuriak batanyo ka Pak Osu. “Carito apo? Kini indak ado carito doh. Utak den panik. Sinayan bisuak anak-anak harus masuak sikola, pitih ndak ado. Sipatu anak nan gadang lah cabiak, nan kaciak ka masuak es-de pulo. Panik den!” Hanyo itu jawek Pak Osu. “Kok itu nan Pak Osu katoan, lah samo se wak tu nyo. Nan den tanyoan, lah di kampuang Pak Osu kajadiannyo ko ha. Indak sampai saparo pagawai di situ nan masuak kantua doh,” capek-capek Udin manjalehan apo nan inyo mukasuik. “Jan mambuek isu juo Din!” Tacin Barain maminteh. “Iko indak isu doh Cin. Iko batamu lansuang dek wakia bupati mah. Dari saluruh kantua nan dicaliak dek apak tu jo rombongannyo, kahadiran pagawai cuma tigo puluah parsen. Itu aratinyo tujuah puluah parsen pagawai indak jaleh dima rimbonyo,” kato Udin manjalehan. “Inyo dinas lua mah!” Tadanga sorak Kari Garejoh. “Ha....ha....batua juo mah. Kalau di dalam tantu basuo dek Pak Wabup tu ndak Ri?” baleh Udin. “Di kampuang den ado pameonyo mah. Di sawah pangkua balabiah, di rumah pinggan ndak sadang. Karajo maleh, makan saupiah. Gaji nak gadang, datang ka kantua indak amuah. Lai bana datang ka kantua, acok talambek. Malah, banyak lo nan dinas lua bak kecek Kari tadi. Yo di lua kantua. Umpamonyo di pasa atau ka daerah lain bagai dan nan bantuak iko indak hanyo di kampuang Pak Osu se kajadiannyo, tapi ampia di tiok daerah. Nah, kabatulan nan di kampuang Pak Osu tu kan dek lah tabiaso se bakarajo suko-suko hati,” giliran Mak Pono basuaro. “Batoh Mak. Bantuak indak sakampuang se wak mah. Sacaro administrasi daerah awak memang tapisah Mak, tapi dalam adaik jo budaya awak tu ciek sajak dulu. Iko kan ulah elit politik nan awih kakuasaan juo mako awak tapisah-pisah deknyo,” baitu kato Pak Osu. “Iyo Su, tapi nan di tampek den lai indak coitu pagawainyo doh. Walau labiah dakek ka Padang dan ka Bukik Tinggi, tapi kahadiran pagawai lai langkok tiok hari. Jadi, paralu Pak Osu maagiah panataran ka pagawai-pagawai tu supayo patuah jo aturan. Awak se di lapau ko indak ado aturan tatulih dan indak lo pakai absen-absenan doh, tapi patuah jo aturan. Pagi-pagi lah duduak wak di palanta lapau, jam salapan pai lo karajo. Indak ado nan malangga doh. Iko, sudahlah digaji dek pamarentah, tiok taun naiak pulo gajinyo. Pasilitas diagiah, pansiun dapek pulo, eh tibo di karajo pamaleh. Ka jadi apo dalam paruik nan dimakan tu?” Agak panjang Mak Pono mangaluakan pandapeknyo. “Nyo bantuak iko mah Mak. Rato-rato urang masuak manjadi pagawai kan nio sanang. Karajo sanang, rasaki jaleh dan pasti. Kan iyo bantuak itu ndak Tan?” Manyalo pulo Angah Piyan sambia mampaiyokan ka konco palangkinnyo. “Sakali ko bialah ambo no komen se Ngah. Lah maleh ambo. Mantang-mantang dimanjoan dek pamarentah, maingkek-ingkek parangainyo,” hanyo itu nan bisa dikatoan dek Tan Baro. Karano matoari lah batambah tinggi juo, urang-urang tu baransua kalua dari lapau untuak pai karajo. (eSPe St.Soeleman)