Palanta Lapau-Sadonyo Naiak

“Baa Ncu. Sajak dulu den sarankan supayo diansua-ansua mampelok-i rumah tu. Kini baa? Lah naiak lo harago simin. Biasonyo kalau harago simin lah naiak, juo diikuti dek harago batubata, kasiah, kareke dan bahan bangunan lain.” Baitu kato Mak Pono ka Uncu Labai nan samo duduak di palanta lapau Uwo Pulin pagi kapatang. Apo nan dikatoan Mak Pono tu dipicu barita ‘Singgalang’ nan bajudul ‘Harga Semen Naik’. Diakui atau indak, sampai kini masih banyak urang di nagari ko nan sadang paguno simin. Karano masih banyak di antaronyo sadang marehab rumahnyo nan rusak atau runtuah dek ulah gampo tahun 2009 lapeh. Nah, dalam kondisi bantuak itu tibo-tibo harago simin naiak, tantu mambuek panik urang punyo rumah. Apolai bantuan dari pamarentah masih ado juo nan alun turun. “Lah sadonyo se nan naiak nampaknyo mah!” Hanyo itu komentar Uncu Labai. “Kini memang maso-masonyo naiak mah Ncu. Partamo lantaran gaji pagawai naiak. Nan kaduo karano ka masuak puaso. Nan ka tigo sudah puaso ado lo lebaran. Nan ka ampek khusus simin karano ongkos angkuik naiak ditambah lo urang banyak mambutuhkannyo. Kan lah bak kecek awak salamo ko, hukum pasa kalau urang mambali banyak, barang saketek, mako harago otomatis naiak. Faktor nan kalimo, ka anam dan sataruihnyo ndak tau den doh. Antah iyo itu alasannyo antah indak, ndak lo jaleh di den doh,” kecek Mak Pono manjalehan sasuai jo isi kapalonyo surang. “Yolah batambah parah iduik nampaknyo mah. Lah kasadonyo se nan naiak,” potong Udin Kuriak. “Sabananyo ado nan turun dek ulah harago-harago naiak tu mah,” tibo-tibo Angah Piyan manggantuang kalimatnyo. “Apo tu Ngah?” Tanyo Uncu. “Sarawa!” Jawek Angah singkek. “Porno Angah mah!” potong Uncu baliak. “Eh, iko indak porno gai doh Ncu. Bayangkanlah dek Uncu, dek ulah harago-harago kaparaluan iduik naiak, pandapatan indak batambah, otomatis awak bapikia panjang baa supayo pandapatan sabanyak itu bisa cukuik untuak iduik. Dek pikia ka pikia, badan kuruih juo. Nah, kalau badan kuruih tantu pinggang sarawa manjadi lapang. Marorohlah jadinyo,” Angah manjalehan alasannyo ka Uncu sambia galak manih. “Indak saluruhe lo naiak doh Ncu. Masih ado nan turun, bahkan tambin sajadi-jadie,” tadanga pulo suaro Ajo Tondeh. “Apo nan turun dek Ajo?” Tanyo Uncu nio tau. “Kambie di kampuang den tu ha!” Hanyo itu jawek Ajo. “Ajo kalera! Tantu iyo. Kalau di ateh batangnyo se, baa pulo urang mambali? Baa nyo bisa manjadi santan?” Baleh Uncu nan maraso kanai karajoan dek Ajo Tondeh. “Salain karambia Jo, harago diri banyak pulo turun dek ulah harago barang nan naiak tu. Urang indak malu-malu korupsi, pungli sampai karajo sepe duo jari,” kecek Kari Garejoh. “Ha....., apo lo tu sepe duo jari? Tanyo Angah Piyan. “Mancacak!” Jawek Kari singkek. Baitulah ota di lapau Uwo Pulin pagi kapatang. Udaro taraso labiah angek daripado hari-hari sabalunnyo. Langik tampak barasiah, indak ado awan nan manutuik matoari. (eSPe St.Soeleman)