Saparo je Nyeh

“Saparo je nyeh Mak!” Lapau nan tadinyo taraso tanang dek samo-samo asik mambaco barita koran ‘Singgalang’ barubah manjadi rami. Maklum, kalau lah Ajo Tondeh nan mamulai ota, pasti labiah angek. “Apo nan saparo Jo?” Sorak Mak Pono mananggapi. “Iko ha, bacolah dek Mamak. Dari tigo puluah ampek mantari kecek koran ko, tujuah baleh nan lai salasai karajoe sasuai jo rancana. Itu kan aratie saparo. Nah nan saparo lai, manga je wee?” Baleh Ajo baliak batanyo. “Biaso se tu nyo Jo. Kan baru saparo pulo tahun ko jalan,” kecek Mak Pono. “Ooo...., jadi samo-samo saparo mah ye?” Capek Ajo mamotong. “Lai indak dek ulah damam pangguang?” Tadanga suaro Angah Piyan. “Mukasuik Angah?” Tanyo Ajo. “Dari lua raso-raso ka santiang bana. Maklum awak urang hebat mah. Tapi katiko lah diagiah bana tangguang jawek, ilang akanyo. Indak tantu nan ka inyo kakok lai. Saumpamo urang santiang banyanyi di rumah atau di kamar mandi. Mancaliak urang banyanyi di ateh pentas, raso-raso ka hebat pulo. Raso-raso ka tatagun dan batapuak-tapuak tangan urang nan manonton, tapi wakatu dapek kasampatan naiak pentas, manggigia lutuik jo suaronyo. Indak jaleh kunci apo nan harus dipakai dek pamain musik lai,” baitu Angah manjalehan langkok pakai contoh. “Ha....ha...., ado-ado se contohnyo dek Angah mah,” potong Udin Kuriak. “Di nagari ko kan memang bantuak itu. Katiko manjadi panonton hebatnyo bukan main, tapi cubolah disuruah lo inyo maju, tapanca salemonyo,” baleh Angah. “Kalau lah bantuak iko kajadiannyo baa mustinyo lai Tan?” Tanyo Udin ka Tan Baro. “Tagantuang kumandan gadang, yaitu presiden. Karano nan diurus ko negara, bukan organisasi. Salah-salah maurus negara, bisa kacau saumua iduik. Apolai dalam kondisi kini, kabanyakan awak lah barajo ka hati surang-surang se. Awak se nan hebat ndaknyo, urang lain bodoh sadonyo. Apo sajo nan dikarajoan pamarentah pasti dikritik. Kasudahannyo, lah abih se hari dek mangecek ka mangecek. Urang lain lah sampai ka bulan, nan awak mangecek ka mangecek juo lai,” hanyo itu komentar Tan Baro. “Lai indak ka baganti baruak jo cigak?” Batanyo pulo Kari Garejoh. “Kalau indak hati-hati mamiliah, bisa labiah parah dari itu. Makonyo presiden musti baiyo dan mintak pandapek ka tokoh-tokoh nan batua-batua mangarati jo negara. Ijan tokoh politik. Kalau masih jo tokoh politik, pasti layang-layang inyo nan dianjuangan. Di antaro banyak panyabab nagari bantuak kini ko kan ulah kapentiangan politik dek Kari,” jawek Tan Baro. “Jadi?” “Yo harus dicari manusia-manusia nan manguasoi bidangnyo. Umpamonyo masalah patanian ijan ka sarjana hukum diagiahan. Masalah hukum ijan pulo ka urang teknik disarahan. Harus sasuai jo kaahliannyo,” jawek Tan Baro baliak. (eSPe St.Soeleman)