Buah Pidato

Urang-urang di nagari ko banyak nan hebat bapidato. Malah, saandainyo ado patandiangan pidato, barangkali urang dari nagari ko nan juara. Mulai dari juara satu sampai juara harapan, diborong sadonyo. Indak ka ado jatuah ka nagari lain doh. Pikiran bantuak itu malinteh-linteh di kapalo Kari Garejoh sasudah mambaco barita di koran ‘Singgalang’ nan bajudul ‘Mensos Optimis Indonesia Bebas Gepeng’. Mulonyo Kari indak tau apo arati gepeng. Nyo sangko si Gepeng nan jadi palawak tu, ruponyo ado kapanjangannyo yaitu gelandangan jo pengemis atau tukang mintak sidakah nan bakaliaran ilia mudiak sarato di lampu-lampu merah. Di Padang atau di Minangkabau umumnyo memang indak baitu banyak nan mintak sidakah, tapi di kota-kota lain sarupo Jakarta, Banduang, Surabaya atau lainnyo sabana bajibun jumlahnyo. Di satiok lampu merah, ado nan mintak sidakah. Babagai caro inyo mamintak pitih ka urang nan lalu. Ado nan lansuang manampuang tangan, ado icak-icak jadi pangamen, ado mambarasiahan kaco oto, ado nan menyemprot parfum sarato banyak lai caro lainnyo. Nan tapikia dek Kari, apo iyo lai ka bisa nagari ko bebas dari urang-urang mintak sidakah tu? Rasonyo indak mungkin. Karano urang mamintak sidakah adolah bukti dari iduik bansaik. Saandainyo urang-urang tu kayo, pasti indak ka mintak sidakahnyo doh.“Bapidato tu iyo lamak ndak Tan. Apo nan takana bisa disabuik, walau dek urang nan mandanga indak masuak aka bagai,” baitu kato Kari Garejoh ka Tan Baro nan duduak basabalahan di lapau Uwo Pulin manjalang babuko kapatang. “Tagantuang nan dipidatoannyo,” baleh Tan Baro. “Kalau iko baa pandapek Tan Baro. Katonyo tahun 2014 nagario ko indak ado lai galandangan jo urang mintak sidakah,” kato Kari baliak. “Sia nan mangecek?” Tanyo Tan Baro. “Mantari Sosial!” Jawek Kari. “Pandapek ambo, salagi di nagari ko urang bansaik masih banyak, mako urang mintak sidakah jo galandangan indak ka abih-abih doh. Kini, apo bisa dek mantari tu mailangkan urang bansaik dalam duo satangah tahun lai? Rasonyo indak mungkin. Karano samakin hari panduduak di nagari ko samakin batambah, lapangan karajo samakin payah, kabutuhan iduik juo batambah,” kecek Tan Baro. “Sapandapek awak mah Tan? Kalau menuruik den juo indak ka pernah abih urang mintak sidakah jo galandangan di nagari ko doh. Malah, bisa batambah banyak. Apolai manjalang-manjalang rayo ko, bisa limo kali lipek tambahnyo mah,” kato Mak Pono pulo. “Manga pulo itu dibahas dek awak. Namonyo se buah pidato, tantu dima nan ka sanang se hati urang mandanga,” potong Udin Kuriak. “Dek wartawan babuek pulo baritanyo mah yo!” Kecek Tan Baro baliak. “Kalau indak dibuek dek wartawan tantu indak tampak ukuran kasantiangan tukang pidatonyo doh,” semba Angah Piyan. “Kasantiangan atau kabodohannyo, Ngah?” Tanyo Kari. “Symbarang dek nan mambaco se lah!” Jawek Angah. Karano matoari lah ampia tabanam, urang-urang tu pun bubar untuak manuju rumah surang-surang. (eSPe St.Soeleman)