Babaleh Cakak-Palanta

“Lai takana juo dek Angah pagawai-pagawai di Depag nan rapelnyo dimintak baliak?” Tan Baro batanyo ka Angah Piyan nan duduak basabalahan di palanta lapau Uwo Pulin pagi kapatang. Tantu sajo Angah bapikia saketek, karano memorinyo lah agak mulai lamah, atau mungkin juo lah panuah. “Nan ma yo?” Tanyo Angah sambia mamacik kaniang. “Itu ha, kalau ndak salah tigo taun nan lapeh. Urang-urang nan baru diangkek manjadi pagawai kan manarimo rapel. Ado nan sapuluah juta, duo puluah juta dan bahkan ado nan sampai tigo puluah juta bagai. Nah, baru se ditarimo dek pagawai, lah dimintak baliak dek pajabaik Depag. Padohal ado nan lah mambalanjoan saparo, ado nan lah dibayian ka utang, bahkan ado nan lah abih dibalian ka bahan bangunan. Cubolah Angah kana-kana bana. Kalau ndak salah wakatu itu awak katoan taulok lidah nan mamintak tu mah?” Tan Baro mancubo manjalehan ka kawannyo tu. “Oh, itu Tan! Di kampuang den memang bantuak itu sumpah urang tuo-tuo daulu mah. Barang-barang nan lah diagiahan, tapi dimintak baliak, mati taulok lidahnyo beko. Iyo lai takana di den mah. Baa kok itu nan takana dek Tan Baro?” Giliran Mak Pono nan mangecek. “Pajabaik-pajabaik nan mamintak pitih tu, ka dipanggia dek de-pe-er. Akan ditanyo apo dasar mamintak pitih tu. Pokoknyo baurusan jo dewanlah,” jawek Tan Baro. “Kalau baitu bisa babaliak pitih rapel tu- baliak mah yo Tan?” Tadanga suaro Udin Kuriak. “Kalau indak ado dasar hukumnyo tantu iyo,” jawek Tan Baro. “Alhamdulillah!” Baleh Udin. “Baa coitu Din?” Tanyo Tacin Barain. “Karano adiak urang rumah den kanai wakatu itu. Untuak mambaliak-an pitih rapel tu tapaso inyo manggadaikan sawah. Karano pitih rapel tu lah dibayiakan ka utang saparo dan saparo lai dibalian ka bahan-bahan bangunan untuak mampaelok-an rumahnyo,” baitu panjalasan Udin. “Barati babaleh juo cakak urang Depag tu mah yo. Makonyo, jan babagak-bagak awak. Doa urang taniayo dikabulkan Tuhan. Mudah-mudahan se babaliak pitih rapel tu baliak,” kasudahannyo Angah mangecek juo. “Makonyo, ijanlah biasoan sawenang-wenang atau maniayo urang lain. Apolai maniayo urang nan lamah. Allah itu Maha Adil dan Maha Bijaksana. Bak kecek Angah tadi, doa urang-urang taniayo dikabulkan Allah. Kan indak etis, rapel nan lah dibagian ka pagawai-pagawai baru tu dimintak baliak. Malah pakai ancaman pulo tu. Samantaro dasarnyo indak ado. Itu kan maniayo namonyo,” Uncu Labai nan dari tadi sabagai pandanga sajo, lah sato pulo mangaluakan pandapeknyo. “Iyo, tapi jan ka den Uncu mancaliak. Saolah-olah den nan maniayo pagawai-pagawai tu,” kato Kari Garejoh. “Ha....ha.....” Tasambua galak urang salapau pagi tu dek ulah kalimat Kari. (eSPe St.Soeleman)