Banyak Takana, Banyak Lupo

Saparo urang di lapau Uwo Pulin takajuik mancaliak barita koran ‘Singgalang’. Baa ka indak? Pajabaik sangaik pentiang bana nan salah mambaco Pancasila. Padohal Pancasila tu lah diajaan sajak sikola puluahan tahun nan lapeh. Urang-urang tu yakin wakatu sikola dulu apak pajabaik pentiang tu pasti pernah upacara bendera satiok hari Sinayan sarato hari-hari gadang nasional. Dalam upacara bendera lah pasti pulo ado pambacaan Pancasila. Tapi kini, katiko manjadi pajabaik, tanyato lupo urutannyo. Nan di ateh jadi ka bawah, dan nan di bawah lah ka ateh painyo. Karano memang kajadian bantuak itu sabana langka, mako barita itu pulolah nan dijadian ota dek urang-urang di lapau tu. Sarupo sabalun-sabalunnyo, ota tantu sajo dibumbui jo garah. Kadang-kadang ado pulo garah kudo bagai. “Sajak kaciek dek mambaco Pancasila lai, bisa juo lupo?” Baitu kato Mak Pono. “Lupo tu fitrah manusia mah Mak. Jankan Pancasila, kadang-kadang makan bisa lupo, karajo bisa lupo dan lain-lain juo bisa lupo,” Udin Kuriak mananggapi kato Mak Pono. “Tapi kalau pajabaik pentiang satingkek kapalo daerah lupo jo Pancasila, itu kan malu wak. Den yakin, apak tu dulu pernah baraja pe-em-pe wakatu sikola. Yakin pulo den apak tu sato upacara-upacara dan juo yakin apak tu pernah sato panataran pe-ampek. Tapi baa kok lupo?” Baleh Mak Pono. “Nyo dari banyak nan takana, pasti banyak lo nan lupo mah Mak. Bak kecek pepatah awak, pasa jalan dek baturuik, apa kaji dek baulang. Nah, bisa se apak tu indak ado maapa Pancasila tu lai, lantaran kasibukannyo. Kan awak samo tau pajabaik salevel kapalo daerah pasti banyak nan diurusnyo. Pasti banyak kasibukannyo, sahinggo indak sempat maapa Pancasila,” Kari Garejoh lah sato pulo basuaro. “Ado pulo di antaro awak, sok-sok apa, sahinggo lupo,” potong Tacin Barain. “Salamo iduang den ditampuah angok, lah duo kali den mandanga pajabaik pentiang salevel kapalo daerah lupo jo urutan Pancasila. Partamo wakatu den sikola, lah diagiah teksnyo dek ajudan, eh apak tu manulak. Kasudahannyo lupo urutannyo. Sila nan ka tigo manjadi sila kaduo. Dek upacara di rumah sikola lah ka namonyo, basorak kawan-kawan tu deknyo. Nah, kini dari barita koran den baco, ajudan apak tu bana nan indak arif maagiahan teks ka apak tu, sahinggo lah tabaliak urutan sila Pancasila tu deknyo. Untuang se lai indak upacara anak sikola, sahinggo indak ado nan basorak,” baitu Mak Pono bacarito. “Biaso je tu nyeh. Jo anak bini ado juo ughang nan lupo, apolai Pancasila,” Ajo Tondeh lah manyorong pulo. “Ha....ha...., iyo lo yo Jo. Bak kecek Udin tadi, lupo tu fitrah manusia ndak? Mudah-mudahan pulo apak tu lai ndak lupo jo kabutuhan rankyaik di nagari ko. Mudah-mudahan juo ndak lupo jo janji-janji samaso kampanye daulu,” kecek Kari. (eSPe St.Soeleman)