Ciek Sapuluah

Cuaca Kota Padang agak tarang dari hari-hari sabalunnyo. Matoari nampak labiah garang. Sapakan balakangan, cuaca buliah dikatokan indak manantu. Kadang dari pagi sampai malam kabuik se. Kadang juo hujan dari pagi sampai siang.  Walau cuaca baubah-ubah, namun kabiasaan minum pagi ka lapau Uwo Pulin indak barubah doh. Ampia indak ado di antaro palanggan lapau tu nan absen baitu sajo, kacuali mungkin ado kaparaluan pentiang sarupo pulang kampuang. Tan Baro dan kawan-kawannyo batua-batua setia jo lapau Uwo. Itu bisa dimaklumi, karano duduak pagi-pagi ka lapau tu indak hanyo sakadar maruduik kopi angek, tapi banyak kauntuangan lain. Saindaknyo di lapau tu bisa mandapek informasi paliang baru malalui koran ‘Singgalang’ nan lah batahun-tahun dilanggani. Di lapau tu juo bisa baraja bademokrasi, maharagoi beda pandapek. “Iko ado caro baru!” Tibo-tibo tadanga suaro Mak Pono nan kabatulan mandapek bagian halaman partamo koran ‘Singgalang’. “Caro baru manga tu Mak?” Tanyo Udin Kuriak. “Surang pajabaik dinilai dek sapuluah urang. Mulai dari atasannyo, kawan salevel dan anak buah,” jawek Mak Pono mampacaliak-an barita nan bajudul ‘Satu Pejabat Dinilai oleh 10 Orang’. “Ciek sapuluah pabandiangannyo tu Mak?” Potong Angah Piyan. “Ha...ha....iyo. Kalau maaduak simin pabandiangannyo ciek ampek, iko ciek sapuluah,” jawek Mak Pono. “Den raso iko indak ka banyak mambantu doh,” kato Kari Garejoh agak lunak. “Baa tu?” Tanyo Mak Pono. “Karano masih urang dalam juo. Kalau atasannyo barangkali bisa maagiah nilai agak objektif kecek urang kini. Tapi nan kaawan saleting apolai anak buah, indak ka bisa doh. Anak buah pasti takuik ka atasan. Den raso iko bisa maundang kolusi. Umpamonyo antaro den jo Udin. Kalau nio samo-samo dapek nilai rancak, tantu samo-samo maagiah nilai rancak pulo. Baitu juo ka anak buah, kalau nio capek naiak pangkaik atau golongan, tantu harus maagiah nilai rancak ka atasan,” baitu pandapek Kari. “Tapi kan panilaiannyo diam-diam, Ri!” Kecek Mak Pono. “Bia tarang-tarangan atau anok-anok, nan kolusi indak ka bisa diilak-an doh. Picayolah!” Jawek Kari. “Jadi baa nan rancak?” Tanyo Udin Kuriak. “Nan rancak tu baliak-an se ka hati nurani surang-surang. Saluruh pajabaik harus manyadari jabatan itu amanah. Harus ditanamkan dalam diri baraso pitih nan ditarimo tiok bulan adolah dari rakyaik dan harus dibaleh jo karajo maksimal. Labiah dari itu, tanamkan dalam diri baraso Allah maawasi. Caro itu den raso akan samakin manjadikan pajabaik jo pagawai maraso batangguangjawek ka dirinyo surang dan Allah. Nan masih bangkang atau kalua dari rel, parantian se,” kato Kari. “Wah, lah jalan kincia-kincia Kari kini mah,” tadanga suaro Tan Baro. “Aia lah mulai gadang, Tan. Kapatang-kapatang ko mungkin dek musim paneh, jadi aianyo ketek sahinggo indak jalan kincia-kincia deknyo doh. Ha....ha.....,” hanyo itu jawek Kari. (eSPe St.Soeleman)